Ponda molestation case

फोंडा: उसगाव ग्रामपंचायतीचे सचिव होनाजी अनिल मोरजकर (वय ५५ वर्षे) याच्याविरुद्ध एका युवतीने विनयभंगाची तक्रार फोंडा पोलिसांत आज (मंगळवारी) दाखल केली. सत्तरी भागातील ही युवती सर्व्हेअर म्हणून कंत्राटी तत्त्वावर उसगाव पंचायतीत कामाला होती.

मात्र, कामाच्या निमित्ताने सचिवाने विनयभंग केल्याची तक्रार या युवतीने केली आहे. उसगाव - गांजेच्या पंचसदस्य मनीषा उसगावकर यांच्या सहकार्याने पीडित युवतीने ही तक्रार दाखल केली असून त्यात पंचायत सचिवाने या युवतीच्या मोबाईलवर पाठविलेले मेसेजही जोडले आहेत.

२ ऑक्टोबर २०२४ रोजी ही युवती उसगाव पंचायतीत कंत्राटी तत्त्वावर फिल्ड सर्व्हेअर म्हणून रूजू झाली होती. संबंधित सचिवाने तिला २४ हजार रुपये वेतन दिला जाईल, असे सांगितले होते. मात्र, धनादेशाद्वारे मिळणाऱ्या या वेतनातून ९ हजार रुपये रोख स्वरूपात पंचायत सचिवांकडे परत करण्यास सांगण्यात आल्याने प्रत्येक महिन्याला ९ हजार रुपये परत केले जायचे.

१५ ऑक्टोबरला या युवतीला फिल्ड सर्व्हेअरचे काम बंद करून कार्यालयीन कामासाठी बोलावले. त्याचा फायदा घेत पंचायत सचिव होनाजी मोरजकर याने मोबाईलवर अश्‍लिल मेसेज पाठवायला सुरुवात केली, तसेच विनयभंग केल्याचे या तक्रारीत म्हटले आहे. या युवतीने काम सोडले असून फोंडा पोलिसांनी ही तक्रार दाखल करून घेतली आहे.