मडकई: फोंडा - पणजी महामार्गावरील काळी माती - भोम येथे काल दुचाकी अपघातात दुचाकीस्वार सुनील विजय गुप्ता (वय 22) या तरूणाचा मृत्यू झाला. सुनील हा मूळ उत्तर प्रदेश येथील असून तो एका खासगी कंपनीत ‘डिलिव्हरी बॉय’ म्हणून काम करीत होता. सुनील गुप्ता हा आपल्या कुटुंबासमवेत दासोळवाडा - कुंडई येथे एका भाड्याच्या घरात राहत होता. सुनील गुप्ता हा सकाळी वस्तूंची डिलिव्हरी करण्यासाठी घरातून बाहेर पडला होता.

दुपारी घरी परतताना काळी माती - भोम येथे अज्ञात वाहनाची त्याच्या जीए-05 - एन - 5578 या क्रमांकाच्या दुचाकीला ठोकर बसली. या ठोकरीनिशी तो जमिनीवर फेकला गेला व त्याचा जागीच मृत्यू झाला. ठोकर दिलेल्या अज्ञात वाहनचालकाने वाहनासह पळ काढल्याचा कयास व्यक्त करण्यात येत असून पोलिस या वाहनाच्या शोधात आहेत.

सुनील गुप्ता हा युवक आई, वडील, बहिणीसमवेत कुंडईत राहत होता. हल्लीच त्याच्या बहिणीचे उत्तर प्रदेश येथे लग्न करून देण्यात आले होते. त्याची आई सध्या मुलीकडे असून सध्या सुनील वडिलासमवेत कुंडईत राहत होता. फोंडा पोलिसांनी या अपघाताचा पंचनामा केला असून मृतदेह शवचिकित्सेसाठी बांबोळी इस्पितळात पाठवला. पोलिस अधिक तपास करीत आहेत.