पणजी: केंद्रीय पेट्रोलियम व नैसर्गिक वायू तसेच पर्यटन राज्यमंत्री सुरेश गोपी यांनी गोवा दौऱ्यादरम्यान राज्यातील महत्त्वाच्या पर्यटन प्रकल्पांचा आढावा घेतला.

पर्यटन विभागाचे सचिव संदीप जॅकीस, पर्यटन संचालक केदार नाईक, गोवा पर्यटन विकास महामंडळाचे व्यवस्थापकीय संचालक कुलदीप आरोलकर, पर्यटन मंत्र्यांचे विशेष कार्य अधिकारी शॉन मेंडिस तसेच इतर मान्यवर उपस्थित होते.

दौऱ्यादरम्यान केंद्रीय राज्यमंत्र्यांनी पर्वरी येथील टाऊन स्क्वेअर प्रकल्पाला भेट देऊन प्रत्यक्ष पाहणी केली. सामाजिक संवाद, सांस्कृतिक उपक्रम आणि नागरिकांचा सक्रिय सहभाग वाढविण्यासाठी विकसित करण्यात येत असलेला हा प्रकल्प राज्यातील एक महत्त्वाकांक्षी नागरी उपक्रम मानला जात आहे.