म्हापसा- करासवाडा येथे सोमवारी सायंकाळी विहिरीत पडलेल्या तीन वर्षीय मुलीला म्हापसा अग्निशमन दलाच्या जवानांनी वाचवले. तिला  वाचवल्यानंतर तिच्यावर प्राथमिक उपचार करून 108 रुग्णवाहिकेद्वारे म्हापसा येथील जिल्हा रुग्णालयात हलविण्यात आले होते. मात्र, सायंकाळी उशिरा या मुलीचा मृत्यू झाला. या घटनेने परिसरात हळहळ व्यक्त करण्यात येत आहे.  

याबाबत माहिती अशी की, ही मुलगी इतर काही मुलांसोबत खेळत होती. खेळताना बॉल विहिरीवरील वायरच्या जाळीवर पडला.तो काढण्यासाठी ती विहिरीवर चढल्याचे सूत्रांनी सांगितले. त्या वायरच्या जाळीवरून ती पडली. सायंकाळी 7.35 च्या सुमारास ही घटना घडली.

कॉल मिळताच अग्निशमन दलाच्या कर्मचाऱ्यांनी घटनास्थळी धाव घेतली, मात्र अंधारामुळे शोधकार्यात  अडथळा येत होता. अग्निशमन दलाच्या कर्मचाऱ्यांनी  अथक प्रयत्नांनी तिला विहिरीतून बाहेर काढले. मात्र, सायंकाळी उशिरा या दुर्दैवी मुलीचा मृत्यू झाला.