सासष्टी: दारूच्या नशेत असलेला माणूस सगेसोयरे, चांगलं वाइट, सगळच विसरून जातो. अशीच एक धक्कादायक घटना गोव्यातील नावेली येथे घडली आहे. दारूच्या नशेत मामाने भाचीच्या पोटात सुरा खुपसून गंभीररीत्या जखमी केल्यानंतर स्वतःच पोलिसात जाऊन या घटनेची माहिती दिली.

या प्रकरणी संशयित शरीफ शेख (वय 45) यास मडगाव पोलिसांनी ताब्यात घेतले असून या हल्ल्यात जखमी झालेल्या जेनिफर कलहट्टी (वय 20) हिच्यावर गोमेकॉत उपचार सुरू आहेत. ही घटना काल नावेली येथे घडली.

काल दुपारी दारूच्या नशेत असलेल्या शरीफ शेख याच्याकडे क्षुल्लक कारणावरून जेनिफरचा वाद झाला. या वादात रागाच्या भरात शरीफने जेनिफरच्या पोटात सुरा खुपसून गंभीर जखमी केले. या हल्ल्यात जखमी झालेल्या जेनिफरला त्वरित जिल्हा रुग्णालयात दाखल करण्यात आले, पण नंतर तिची प्रकृती खालावत चालल्याने तिला गोमेकॉत हलविण्यात आले.