मुंबईतून गोव्यात पर्यटनासाठी आलेल्या तीन पर्यटक कांदोळी येथील समुद्रात बुडल्याची घटना आज (दि.१९ जुलै) सकाळी अकरा वाजता उघडकीस आली. दुर्दैवाने यातील दोघांचा मृत्यू झाला असून, एका महिलेवर बांबोळीतील गोवा वैद्यकीय महाविद्यालयाच्या रुग्णालयात उपचार सुरु आहेत.

कांदोळी पोलिसांनी दिलेल्या माहितीनुसार, पोलिसांना आज (गुरुवारी) सकाळी तीन पर्यटक समुद्रात बुडाल्याची माहिती मिळाली. यामध्ये दोन महिला आणि एका पुरुषाचा समावेश होता. कुटुंबीय आणि मित्रांसोबत तिघेहीजण गोव्यात पर्यटनासाठी आले होते.

घटनास्थळी असलेल्या पर्यटक पोलिस आणि जीवरक्षकांनी तिघांना बाहेर काढून प्राथमिक उपचार दिले व पुढील उपचारासाठी कांदोळी प्राथमिक रुग्णालयात दाखल केले. पण, एक महिला व पुरुषाला डॉक्टरांनी मृत घोषित केले. तर, दुसऱ्या एका महिलेला पुढील उपचारासाठी गोवा वैद्यकीय महाविद्यालयाच्या रुग्णालयात दाखल करण्यात आले आहे.

गोव्यात गेल्या आठवड्यापासून मुसळधार पाऊस होत आहे. हवामान खात्याने बुधवारपासून राज्यात पावसाचा रेड अलर्ट जारी केला आहे. स्थानिक तसेच पर्यटकांना सतर्कतेचा इशारा देण्यात आला आहे.

दरम्यान, या पर्यटकांना रेड अलर्टची जाणिव नसल्याने सकाळी तिघेही कांदोळी समुद्रकिनारी मॉर्निंग वॉकसाठी गेले होते.

यावेळी आलेल्या उंच लाटेचा फटका त्यांना बसला व तिघेहीजण समुद्रात वाहून गेले. घटनास्थळी असलेल्या पर्यटक पोलिस आणि जीवरक्षकांनी तिघांना बाहेर काढले.

पुढील पाच दिवस मुसळधार पावसाचा इशारा

हवामान खात्याने पुढील पाच दिवस देखील मुसळधार पावसाचा इशारा दिला असून, १९ आणि २० जुलै रोजी रेड तर २१ जुलैपासून तीन दिवस ऑरेंज अलर्ट देण्यात आला आहे. राज्यात सुरु असणारे पाणी साचण्याचे प्रकार आणि पडझडीच्या पार्श्वभूमीवर नागरिकांना सतर्कतेचा इशारा देण्यात आला आहे.