पणजी : दक्षिण गोव्यातील बाणावली येथील भाड्याच्या व्हिलामध्ये बुधवारी युक्रेनियन नागरिक दिमिट्रो गुरोव (49) याचा मृतदेह सापडला, अशी माहिती गोवा पोलिसांनी दिली आहे.

मिळालेल्या माहितीनुसार, गुरोव डिसेंबर 2021 मध्ये गोव्यात आला होता. तेव्हापासून तो बाणावली बीचजवळ भाड्याच्या व्हिलामध्ये राहत होता. "त्याची मैत्रीण त्याच्यासोबत व्हिलामध्ये राहत होती. तिने परिसरातील स्थानिकांना एकत्र केले आणि त्यानंतर आम्हाला घटनेची माहिती दिली," असे पोलिस निरीक्षक मेलसन कोलाको यांनी सांगितले.

आज किंवा उद्या शवविच्छेदन केले जाईल, असे पोलिसांनी सांगितले. पुढील प्रक्रियेसाठी गोवा पोलिस युक्रेनच्या दूतावासाशी संपर्क साधण्याचा प्रयत्न करत असल्याची माहिती सूत्रांनी दिली. याप्रकरणी अनैसर्गिक मृत्यूची नोंद करण्यात आली आहे. याप्रकरणी कोलवा पोलीस अधिक तपास करत आहेत.