फोंडा : गोव्यात पावसाला जोरदार सुरुवात झाली असून अनेक ठिकाणी पावसामुळे पडझड होत आहे. फोंड्यात पाऊस आणि वाऱ्यामुळे पडझड सुरु असून आज शनिवारी रात्री सव्वा आठच्या सुमारास हवेली - कुर्टी येथे वाऱ्यामुळे आंब्याचे झाड अचानक कोसळून दुचाकीस्वार गंभीर जखमी झाल्याची घटना घडली आहे.

जखमी दुचाकीस्वार मनिषकुमार (वय 35) हा हवेली येथून आपल्या खोलीवर परतत असताना अचानक झाड कोसळले आणि तो झाडाच्या फांदीखाली दबला गेला. यामुळे त्याच्या डोक्याला मार लागला असून, त्याला त्वरित उपचारासाठी फोंडा आयडी उपजिल्हा इस्पितळ आणि तेथून पुढील उपचारासाठी बांबोळी इस्पितळात दाखल करण्यात आले आहे.

दरम्यान फोंडा मतदार संघाचे आमदार तथा कृषीमंत्री रवी नाईक यांनी घटनास्थळी धाव घेऊन स्थितीची पाहणी केली. फोंडा अग्निशामक दलाच्या जवानांनी झाड हटविले.

दरम्यान, मडगावात शुक्रवारी सायंकाळी जोरदार पाऊस पडल्याने नगरपालिका अवरासह स्टेशन रोड परिसर आणि अन्य भाग पाण्याखाली गेल्याने लोकांची धांदल उडाली. नगरपालिका आवारात पावसाचे पाणी वाहून जाण्यासाठी वाटच नसल्याने या परिसराला तळ्याचे स्वरूप आले होते. नगरपालिका उद्यानाचा फुटपाथही पाण्याखाली गेला होता.