कळंगुट: कळंगुट येथे रशियन तरुणीवर अत्याचार करण्यात आल्याचा धक्कादायक प्रकार शुक्रवारी समोर आला आहे. या प्रकरणात पोलिसांनी दोन नेपाळी तरुणांना अटक केली आहे. आज संशयितांना न्यायालयात हजर केले असता त्यांना सात दिवसांची पोलीस कोठडी सुनावली. पीडित तरुणी सध्या डॉक्टरांच्या देखरेखीखाली उपचार घेत आहे.

(Two Nepali youths remanded in police custody for seven days in Calangute rape case )

शुक्रवार दिनांक 2 नोव्हेंबर रोजी सकाळी कळंगुट येथील एका खाजगी हॉटेलात रशियन तरुणीवर अत्याचार करण्यात आल्याची घटना घडली होती. पोलिसांनी हॉटेल सिसीटिव्हीचा आधार घेत संशयित आरोपींना बारा तासांच्या आत अटक केली असून, साकील अन्सारी तसेच साहिमुद्दीन अन्सारी अशी या संशयितांची नावे आहेत.

पोलिसांनी दिलेल्या माहितीनुसार पीडिता पर्यटनासाठी गोव्यात रशियातील 18 पर्यटकांच्या गटासमवेत दाखल होत मैत्रीणीसह रिसॉर्टामधील एका खोलीत उतरली होती. दरम्यान मैत्रीण आपल्या मित्रांसमवेत रिसॉर्टच्या आवारात फिरायला गेली असता हा प्रकार घडला असल्याचे तक्रारीत म्हटले आहे. तसेच पिडीत महिलेची वैद्यकीय तपासणी करण्यात आली असून या तपासणीचा अहवाल लवकरच अपेक्षित असल्याची माहिती पोलीसांनी दिली.