Goa Crime : राज्यात फसवणुकीच्या घटनांमध्ये वाढ होताना दिसत आहे. समाजमाध्यमांवरील सुरक्षेच्या उपाययोजना माहिती नसल्याचा फायदा सायबर गुन्हेगार घेत आहेत. अशातच गोव्यात फसवणुकीच्या दोन घटना समोर आल्या आहेत. या प्रकरणांमध्ये फोंडा येथील महिला व आंध्र प्रदेशातील पर्यटकाला गंडा घालण्यात आला आहे. याप्रकरणी पोलिसांनी संशयिताविरुध्द गुन्हा नोंद केला असून पुढील तपास सुरु आहे.

याबाबत अधिक माहिती अशी की, फसवणुकीच्या पहिल्या प्रकरणामध्ये एस्कॉर्ट सेवा देण्याच्या बहाण्याने आंध्र प्रदेशामधील एका पर्यटकाला गंडा घालण्यात आला आहे. एस्कॉर्ट सेवा देतो असे सांगून पर्यटकाकडून 40 हजार रुपये उकळण्यात आले. पर्यटकाला आपली फसवणूक झाल्याचे लक्षात येताच त्यांनी पणजी पोलिसांत तक्रार नोंद केली असून पणजी पोलिसांनी संशयितांविरोधात गुन्हा नोंद केला आहे. पणजी पोलीस अधिक तपास करत आहेत

फसवणुकीच्या दुसऱ्या प्रकरणामध्ये मोंजिनिसची फ्रेंचाईसी देतो असे भासवून फोंडा येथील महिलेला गंडा घालण्यात आला आहे. तब्बल 7 लाख 15 हजारांचा गंडा घालण्यात आला आहे. याप्रकरणी महिलेने सायबर विभागात तक्रार दाखल केली असून सायबर विभागात गुन्हा नोंद करण्यात आला आहे. सायबर पोलीस प्रकरणाचा अधिक तपास करत आहेत.