Two Bikes Collide At Bicholim: डिचोलीत दोन दुचाकींमध्ये झालेल्या अपघातात एक दुचाकीस्वार जागीच ठार झाला. हा भीषण अपघात गुरुवारी रात्री नऊ वाजण्याच्या सुमारास साष्टीवाडा-बोर्डे परिसरात घडला. मृत दुचाकीस्वार उसप गावातील असून, त्याचे नाव श्रीराम शंकर गावकर (वय ३७ वर्षे) असे आहे.

तो वीज खात्याचा कर्मचारी असल्याची माहिती मिळाली. ड्युटी संपवून घरी जाताना साष्टीवाडा-बोर्डे येथे श्रीरामवर क्रूर काळाने झडप घातली. त्याच्या पश्‍चात पत्नी आणि दोन लहान मुले आहेत. श्रीराम हा दुचाकीवरून अस्नोड्याच्या दिशेने जात होता.

बोर्डे येथे समोरील दुचाकीला ओव्हरटेक करताना त्याच दुचाकीला त्याची दुचाकी धडकली. त्यात दोन्ही दुचाकीस्वार गंभीर जखमी झाले. श्रीरामचे डोके रस्त्यावर आपटून तो अत्यवस्थ झाला. त्याने घटनास्थळी उलटीही केल्याची माहिती मिळाली.

अपघात घडल्यानंतर १०८ रुग्णवाहिकेशी संपर्क साधला. मात्र, रुग्णवाहिका पोचण्यास अर्धा तास उशीर झाला. चोडण येथून रुग्णवाहिका आली. जखमी श्रीरामला आरोग्य केंद्रात नेले असता, तेथील डॉक्टरांनी त्याला मृत घोषित केले.

मृतदेह उत्तरीय तपासणीसाठी गोमेकॉत पाठविला आहे. वरिष्ठ अधिकाऱ्यांच्या मार्गदर्शनाखाली डिचोलीचे उपनिरीक्षक विश्वेश हडफडकर पुढील तपास करत आहेत.