गोवा टॅक्सी अ‍ॅप विषय मंत्रिमंडळासमोर मांडला जाणार असून त्यानुसारच यावर निर्णय घेतला जाणार असल्याची माहिती आज वाहतूक मंत्री मॉविन गुदिन्हो यांनी दिली आहे. तर पर्यटन मंत्र्यांनी मोपावरील टॅक्सीसेवेसाठी पेडणेतील स्थानिकांनाच प्राधान्य देण्यात येणार असल्याची माहिती दिली आहे.

(Transport minister Mauvin Godinho said proposed new Goa taxi app will be brought before the next cabinet for approval )

मिळालेल्या माहितीनुसार मंत्री गुदिन्हो यांनी आज माध्यमांशी संवाद साधला यावेळी गोवा इलेक्ट्रॉनिक्स लिमिटेड (GEL) ने गोवा टॅक्सी अ‍ॅप विकसित केले आहे. ते या “अ‍ॅप आधीच विकसित आणि डिझाइन केलेले आहे. मात्र मंत्रिमंडळासमोर मंजुरीसाठी मांडले जाणार आहे. गोवा मुक्तिदिनी हे अ‍ॅप सुरू करण्याचे उद्दिष्ट राज्य सरकारने ठेवले होते, मात्र ते आता पुढे ढकलण्यात आले आहे. अशी माहिती दिली आहे.

गोवा टॅक्सी अ‍ॅपला काही टॅक्सी मालक आणि ऑपरेटर यांचा विरोध आहे, कारण त्यांना फक्त त्यांची मक्तेदारी चालवायची आहे. त्यामुळे त्यांना हा विरोध करावा वाटत असल्याचं मंत्री गुदिन्हो म्हणाले. पुढे बोलताना मंत्री गुदिन्हो म्हणाले की, हे अ‍ॅप लाँच झाल्यानंतर पर्यटकांना चांगली सेवा देण्यासाठी अ‍ॅपवर नोंदणी करावी लागेल.

“टॅक्सी मालक आणि ऑपरेटर यांना अ‍ॅपद्वारे कमावलेल्या प्रत्येक 100 रुपयांपैकी 5 रुपये अ‍ॅपच्या देखभालीसाठी आणि 5 रुपये कल्याणकारी योजनांसाठी कापले जातील. आणि 90 रुपये थेट मालक आणि ऑपरेटरकडे जातील. तसेच पर्यटकांचा छळ थांबण्यासाठी सरकार गांभिर्याने विचार करत असल्याचं मंत्री गुदिन्हो यांनी म्हटले आहे.

याबरोबरच आमदार संकल्प आमोणकर यांनी माहिती देताना सांगितले आहे की, गोवा पर्यटन खात्याच्या बैठकीत टॅक्सी काऊंटर मुरगाव बंदरावर (Mormugao Port Trust ) स्थापन्यात येणार आहे. तसेच पर्यटन मंत्री रोहन खंवटे यांनी मोपा विमान तळावरील टॅक्सी सेवेसाठी पेडणेवासियांना प्राधान्य देण्यात येणार असल्याची माहिती दिली.