Mauvin Godinho: ग्रामीण भागातील युवकांना रोजगार देण्याचा एक भाग म्हणून आगामी वर्षभरात आणखी 1000 बेरोजगार युवकांना टॅक्सी व्यवसायात आणणार असल्याची माहिती, वाहतूक मंत्री माविन गुदिन्हो यांनी दिली.

गोयंचो टॅक्सी पात्राव या योजनेतून 1000 बेरोजगार युवकांना टॅक्सी देण्यात येणार आहे, अशी माहिती, वाहतूक मंत्री माविन गुदिन्हो यांनी दिली. आज, मंगळवारी राज्य मंत्रीमंडळाची बैठक झाली. त्यातील निर्णयांची माहिती गुदिन्हो यांनी दिली.

गोयचो टॅक्सी पात्राव योजनेची नुकतीच सुरवात करण्यात आली असून त्यातून काही दिवसांपुर्वीच 55 लाभार्थ्यांना टॅक्सी सुपुर्द करण्यात आली होती. महिलांनाही स्वयंपूर्ण करणारी ही योजना असून याद्वारे महिला देखील टॅक्सी पात्राव झाल्याचा आनंद झाल्याचे मुख्यमंत्री डॉ. प्रमोद सावंत तेव्हा म्हणाले होते.

टॅक्सी दिलेल्या 55 पैकी 12 जणांच्या घरात सायकलदेखील नाही. ते टॅक्सीचालकही नाहीत. पण ते आज टॅक्सीचे मालक झाले आहेत. एक पैसा न देता टॅक्सी मिळणार असल्याने याचा लाभ घ्या, असेही मुख्यमंत्री म्हणाले होते.

दरम्यान, या योजनेत सुरवातीला पेडणेतील नागरिकांना प्राधान्य दिले आहे. गोवा माईल्स आणि वाहतूक खात्याच्या संयुक्त विद्यमाने ही योजना सुरू केली आहे. ग्रामीण भागातील ज्यांना टॅक्सी व्यवसायात यायचे आहे, त्यांना टॅक्सीसाठी डाऊन पेमेंट म्हणून एक लाख रुपये निधी मिळेल.

त्या पुढील हप्ते लाभार्थीला भरावे लागतील. या टॅक्सी थेट गोवा माईल्सच्या ॲपवर चालतील. या टॅक्सी या सीएनजीवर चालणार असल्याने त्या पर्यावरणपूरक असतील. त्यासाठी सीएनजी आणि ई-चार्जिंग सुविधा करण्यात येणार आहेत.