वास्को: राज्‍यात महत्त्वाच्या ठिकाणी ‘एआय’ कॅमेरे लावल्याने अपघातसंख्या कमी झाल्याचे वाहतूक मंत्री माविन गुदिन्हो यांनी सांगितले. हे काम पूर्ण झाल्‍यावर अपघातांच्या संख्येत मोठी घट होईल, असेही ते म्हणाले. नवे वाडे येथील गोवा गृहनिर्माण मंडळाच्या जागेतील ५४४ घरे संबंधितांच्या नावावर करण्याचा निर्णय घेतल्‍याचे ते म्‍हणाले.

सार्वजनिक प्रसाधनगृहाच्‍या उदघाटनानंतर आज पत्रकारांना त्‍यांनी ही माहिती दिली. यावेळी नगराध्यक्ष गिरीश बोरकर, नगरसेवक सुदेश भोसले, विनोद किनळेकर, चिखलीच्या उपसरपंच ऐश्वर्या कोरगावकर तसेच स्थानिक रहिवासी उपस्थित होते. वाहनचालकांकडून गोळा केलेल्या दंडाची रक्कम विविध उपकरणे खरेदी करण्यासाठी वापरली जाते. वाहने, थर्मल कॅमेरा, बॉडी कॅमेरा, अल्कोमीटर वगैरेसाठी दंडाची ५० टक्के रक्कम खर्च करण्यात येत असल्याचे मंत्री गुदिन्हो म्हणाले.

माविन म्‍हणाले...

• १ राज्यातील अपघातांची संख्या कमी व्हावी, यासाठी संवेदनशील व अपघाताचा अधिक धोका असलेले ब्लॅक स्पॉट हटविले आहेत. तेथील वळण कमी करताना रस्त्याचे रुंदीकरणही केले आहे.

• २ तेथे कॅमेरे, दिवाबत्तीची सोय केली आहे. वाहतूक नियम मोडल्यास चलन घरच्या पत्त्यावर येईल. त्यामुळे दंड कमी करण्यासाठी पूर्वी जी धडपड केली जात होती, ती बंद होणार आहे.

• ३ लवकरच राज्य मंडळाची बैठक होईल. त्या बैठकीत अपघातासंबंधी व आखलेल्या उपाययोजनासंबंधी चर्चा करण्यात येईल.

करार व्‍यवहार अंतिम टप्‍प्‍यात

घरे नावावर करण्याचे सोपस्कार अंतिम टप्प्यावर पोचले आहेत. मुरगाव पालिका व गृहनिर्माण मंडळ यांच्यात करारवजा व्यवहार पूर्ण झाला आहे. आता मुरगाव पालिका व मुरगाव नियोजन व विकास प्राधिकरण यांच्यामध्ये अंतिम व्यवहार झाला की ती घरे नावावर होण्याचा मार्ग मोकळा होणार आहे, असे गुदिन्हो म्हणाले.