मडगाव: सुरावली येथे झालेल्या दुचाकीच्या अपघातात ३८ वर्षीय तरुणाचा मृत्यू झाला आहे. सुरावली रेल्वे क्रॉसिंगजवळ सोमवारी (०३ नोव्हेंबर) दुपारी दोनच्या सुमारास हा अपघात घडला. परदेशात नोकरीसाठी असणारा हा युवक लग्न करण्यासाठी गोव्यात आला होता.

लिओ फर्नांडिस (वय ३८, रा. पेडा –बाणावली) असे या अपघातात मृत्यू झालेल्या तरुणाचे नाव आहे. रेल्वे क्रॉसिंगजवळील संरक्षक भिंतीला दुचाकी धडकून त्याचा अपघात झाला. दुचाकीवरील नियंत्रण सुटल्याने त्याची दुचाकी भिंतीला धडकली.

यात त्याला गंभीर जखम झाली. उपचारासाठी त्याला रुग्णालयात दाखल करण्यात आले पण, उपचार सुरु असताना त्याचा मृत्यू झाला.

मिळालेल्या अधिकच्या माहितीनुसार, लिओ परदेशात नोकरी करत होता. त्याचे डिसेंबरमध्ये लग्न होते. लग्नासाठी तो गोव्यात आला होता. त्यासाठी त्याने मोठी सुट्टी घेतली होती.

दरम्यान, लिओ बोहल्यावर चढण्यापूर्वीच त्याला काळाने गाठले आणि अपघातात त्याचा मृत्यू झाला. कोलवा पोलिसांनी याप्रकरणी अनैसर्गिक मृत्यूची नोंद केली आहे.