मिलिंद म्हाडगुत

फोंडा : शहरात अनेक ठिकाणी वारंवार वाहतूक कोंडी होते. गरजेच्या ठिकाणी सिग्नल नाहीत. तसेच गतिरोधक नसल्यामुळे अपघात होतात. असे असताना वाहतुकीवर नियंत्रण ठेवण्याऐवजी पोलिस केवळ तालांव देण्यातच मग्न असल्याचा आरोप नागरिकांकडून केला जात आहे.

एखाद्या वळणावर उभे राहिल्यामुळे हे वाहतूक पोलिस दिसत नाहीत. पण शिट्टी वाजवल्यानंतर चालकाची खास करून दुचाकीस्वारांची तारांबळ उडते आणि त्यातून छोटे-मोठे अपघातही घडतात. आधीच शहरात बेफाम वाहतुकीमुळे समस्या निर्माण झाली आहे. त्यात पोलिस रस्त्याच्या मधोमध राहून तालांव देत असल्यामुळे अधिकच कोंडी होताना दिसत आहे.

बागायतदार परिसर हा शहरातील सर्वांत गजबजलेला परिसर. तेथील वाहतुकीवर नियंत्रण ठेवण्याऐवजी पोलिस वाहनचालकांना कसे पकडायचे, याच्या मागे असल्याचे दिसतात. फोंड्यात कोठेही ट्रॅफिक सिग्नल नाही तसेच गतिरोधक नाहीत. त्यामुळे वाहने सुसाट चालवली जातात. विशेष म्हणजे ‘राव रे, वच रे’ करणाऱ्या बसवाल्यांकडे मात्र पोलिस सोयीस्करपणे दुर्लक्ष करताना दिसतात.

बसवाल्यांची मनमानी : जागोजागी थांबत घेतात प्रवासी

वरच्या बाजारात संगम बेकरीशेजारी एकच बस स्टॉप असताना बागायतदार ते संगम बेकरी या पाव किलोमीटरच्या प्रवासात हे बसवाले कमीत कमी चार ते पाच थांबे घेतात, तेही पोलिसांसमोर आणि पोलिस मात्र मूग गिळून गप्प बसलेले दिसतात. हीच गोष्ट मडगाव, सावर्डे, वास्को येथे जाणाऱ्या बसेसची. जुन्या बस थांब्यापासून फोंडा तिस्कापर्यंत या बसेस कमीत कमी पाच थांबे तरी घेतात. त्यामुळे आधीच अनियंत्रित असलेल्या वाहतुकीची अधिकच गोची होते.