Chorla Ghat Blocked: चोर्ला घाटात वारंवार वाहतुक कोंडीचे प्रकार समोर येत आहेत. रविवारीही एका अवजड वाहतूक करणाऱ्या ट्रकमुळे घाटात कोंडी झाली. या ट्रकमुळे रस्ताच ब्लॉक झाला असून घाटातील वाहतूक ठप्प झाली आहे. त्यामुळे बेळगावकडे जाणाऱ्या प्रवाशांना अनमोड घाटातून जाणे सोयीस्कर ठरणार आहे.

काही दिवसांपुर्वीच रात्री 10 नंतर एक वाहन खराब झाल्याने येथील वाहतूक ठप्प झाली होती. पहाटे ही वाहतूक सुरळीत करण्यात पोलिसांना यश आले. या आधी चोर्ला घाटात सप्टेंबर महिन्यात अवजड वाहनांसाठी बंद घालण्याचा आदेश उत्तर गोवा जिल्हाधिकाऱ्यांनी काढला आणि दोन दिवसात बाहेरील वाहनचालकांनी घाटावरच गाड्या अडविणार, भाजी, दुधाची वाहतूकही बंद करणार असा इशारा देताच रात्री 10 ते सकाळी सहापर्यंत या वाहनांना सूट दिली होती.

चोर्लातून 24 तास अवजड वाहनांची ये-जा सुरूच आहे. जिल्हाधिकाऱ्यांनी आदेश काढला, पण कुठेही सीमेवर ‘त्या’ आदेशाची नोटीस लावलेली नाही. त्यामुळे अवजड वाहने दिवसभर घाट रस्‍त्यावरून केरीपर्यंत येतात.

दरम्यान, बेळगावहून गोव्यात येणारी वाहने परतवून लावणे शक्य नसल्याचे पोलिसांचे म्हणणे आहे. कारण गोवा राज्याच्या घाट रस्त्‍यावर वाहने वळवण्यासाठी पुरेशी जागा नाही. मात्र, ही वाहने सुर्ला येथे कर्नाटक तपासणी नाक्यावर रोखणे शक्य असल्याचे प्रवाशांचे म्हणणे आहे.

बेळगावहून येणाऱ्या अवजड वाहन चालकांना गोवा सीमेपर्यंत कुठेही अडवले जात नाही. त्यामुळे ही वाहने थेट घाट रस्त्‍यांने गोव्यात प्रवेश करतात. घाटात त्यांना बंदीबाबत सूचना केल्यानंतर ही वाहने घाटातच रात्री दहा वाजेपर्यंत थांबवली जातात. अरुंद रस्त्यामुळे घाटात अनेक वेळा वाहतूक कोंडी होते.