New traffic fines in Goa

पणजी: राज्यात या महिन्यापासून नियम उल्लंघनाची दंडाची रक्कम डिजिटल पेमेंटद्वारे वाहतूक पोलिसांनी स्वीकारण्यास सुरवात केली आहे. त्याचबरोबर नव्याने लागू केलेल्या दंडाची रक्कम पूर्वीपेक्षा दहा पटीने आहे. हा दंड ठोठावण्यास १ मार्चपासून सुरवात झाली आहे. त्यामुळे बेशिस्त वाहन चालकांना चाप बसणार आहे.

मद्यप्राशन केलेल्या चालकाला १० हजार ते १५ हजार रुपये तर हेल्मेट न वापरल्यास एक हजार रुपये दंड आकारण्यास सुरवात झाली आहे. मोटार वाहन नियमांचे वारंवार वाहन चालकांकडून उल्लंघन होत असल्याने दंडाची रक्कम १० पटीने वाढवण्यात आली आहे.

पूर्वी मद्यप्राशन केलेला सापडल्यास १ हजार ते १५०० रुपये दंड होता तो आता १० हजार रु. दंड व सहा महिने कैद तसेच दुसऱ्यांदा सापडल्यास १५ हजार रुपये दंड व २ वर्षे कैद अशी शिक्षा आहे.

गाडी चालक वा सहचालकाने सीट बेल्ट न लावल्यास पूर्वी १०० रुपये दंड होता तो आता एक हजार रुपये वाढ करण्यात आली आहे. वाहन चालवता मोबाईलवर बोलताना सापडल्यास ५०० रुपये दंड होता तो आता ५ हजार रुपये करण्यात आला आहे.

दुचाकीवर तिघेजण स्वार झालेले आढळल्यास १०० रु. दंड होता तो आता १ हजार रुपये करण्यात आला आहे. वाहन चालवण्याचा परवाना नसलेल्या २०० ते ४०० रुपये दंड दिला जात होता मात्र त्यांना २ हजार रु. दंड व ३ महिने कैद व दुसऱ्यांदा सापडल्यास ४ हजार रु. दंड भरावा लागणार आहे.

असा असेल दंड

प्रदूषण प्रमाणपत्र नसणाऱ्या वाहन चालकांना यापूर्वी १ हजार रुपये दंड दिला जात होता आता तो १० हजार रु. दंड व ६ महिने कैद अशी शिक्षा आहे.

धोकादायकपणे वाहन चालविल्यास ५०० रु. ऐवजी आता नव्याने ५ हजार रुपये दंड आहे.

रुग्णवाहिका या आपत्कालीन वाहनांना जाण्यास वाट करून न दिल्यास १ हजार रुपये दंड होता तो आता १० हजार रुपये करण्यात आला आहे.

सार्वजनिक रस्त्यावर रेसिंग किंवा भरधाववेगाने वाहन चालविल्यास ५०० रुपयांऐवजी ५ हजार रु. दंड भरावा लागणार आहे.

प्रमाणापेक्षा अधिक वजन वाहनात भरल्यास २ हजार ऐवजी आता नव्या दंडाच्या सूचीनुसार २० हजार रुपये दंड तर सिग्नल तोडल्यास ५०० रुपये दंड होता तो आता ५ हजार रुपयांचा दंड वसूल केला जाणार आहे.

१८ वर्षाखालील चालकाला वाहन चालविल्यास २५ हजार रुपये दंड तसेच ३ वर्षे कैद, वाहनाचे रजिस्ट्रेशन एक वर्षासाठी रद्द करणे तसेच त्याला २५ वर्षे पूर्ण झाल्याशिवाय कायदेशीर वाहन परवाना मिळणार नाही.