Tourists Accident in Goa: राज्यात पर्यटकांच्या अपघातांचे प्रमाण वाढले आहे. यामध्ये पर्यटकांचा बेशिस्तपणा हा मुद्दा अधोरेखित होत आहे. गोव्यात येऊन पर्यटक रेंटच्या कार बुक करून मद्य पिऊन गाडी चालवतात यामुळे अपघातांना आमंत्रण मिळते. ते स्वत: गाड्या चालवत असल्यामुळे पर्यटकांच्या अपघातांचे प्रमाण वाढले असल्याचा मुद्दा विधानसभेच्या अधिवेशनात मांडण्यात आला.

एका महिला पर्यटकाने पर्रा रस्त्यावर टॉपलेस गाडी चालवणे, पुरुष पर्यटकांचा एक गट दरवाजे उघडे ठेवून गाडी चालवणे, रहदारीच्या रस्त्यावर स्टंटबाजी करणे आणि समुद्रकिनाऱ्यांवर कार चालवणे अशा घटनांमुळे गोव्याची जागतिक पातळीवर प्रतिमा खराब होत आहे. यावरून वाहतुकीचे नियम ठोस नसल्याचा वाद विधानसभेत सुरू झाला.

अशा घटनांमध्ये, सोशल मीडियावर व्हिडिओ व्हायरल झाल्यानंतर काहींची ओळख पटवून दंड आकारला जातो, तर काहीजण मात्र पोलिसांच्या कारवाईतून सुटतात.

सभागृहात आमदार विजय सरदेसाई आणि आमदार वीरेश बोरकर यांना उत्तर देताना परिवहन मंत्री माविन गुदिन्हो म्हणाले की, अशाच एका घटनेत गाडी चालवणाऱ्या पर्यटकांची ओळख पटवून त्यांना शोधून काढण्यात आले, त्यानंतर त्याच्याकडून 22,500 रुपयांचा दंड वसूल करण्यात आला.

अशा अनेक घटनांमुळे अपघात वाढल्याचे पोलिसांनी सांगितले. 2018 ते 2022 पर्यंत एकूण 317 रेंट-अ-कारचे अपघात झाले आहेत. 2018 मध्ये 72 अपघात, त्यानंतर 2019 मध्ये 56, 2020 मध्ये 43, 2021 मध्ये 70 आणि 2022 मध्ये 76 अपघातांची नोंद झाल्यामुळे ही संख्या वाढली आहे.

दारू पिऊन गाडी चालवणाऱ्यांवर कठोर कारवाई केली जाते, असा दावाही सरकारने केला आहे. 2022 पासून जून 2023 पर्यंत, एकूण 2046 उल्लंघन केल्याची प्रकरणे आढळून आली आहेत आणि 1512 ड्रायव्हिंग परवाने निलंबनासाठी प्राधिकरणाकडे पाठविण्यात आली असून 1667 वाहनचालकांवर कारवाई करण्यात आली आहे.