Panaji Viral Video: काही दिवसांपूर्वी गोव्यातील एका ठिकाणी काही पर्यटक रेन्ट कारच्या छतावर चढून डान्स करत असल्याचा एक व्हिडिओ समोर आला होता. त्यानंतर आता राजधानी पणजीत कॅसिनोपुढेच रेन्ट कारच्या बोनेटवर एक पर्यटक डान्स करत असल्याची घटना समोर आली आहे.

राजधानी पणजीत प्रवेश केल्यानंतर मांडवीच्या किनारी असलेले कॅसिनो स्वागत करतात. कॅसिनो राज्याच्या अर्थव्यवस्थेचा कणा मानले जातात. रात्रीच्या वेळी या भागात मोठी गर्दी पाहायला मिळते. दरम्यान, याच कॅसिनो पुढे मंगळवारी रात्री एक पर्यटक कारच्या बोनेटवर डान्स करताना आढळून आला.

विशेष म्हणजे ही कार देखील भाडे तत्वावर घेतल्याचे दिसून येते. व्हिडिओत हा पर्यटक रेन्ट कारच्या बोनेटवर जोर जोरात नाचताना दिसत आहे.

दरम्यान, यापूर्वी देखील दोन पर्यटक रेन्ट कारच्या छतावर गाण्याच्या ठेक्यावर नाचत असल्याचा व्हिडिओ समोर आला होता. तसेच, काही पर्यटक कारवर बसून धोकादायक पद्घतीने स्टंट करताना देखील आढळून आले आहेत. पोलिसांनी तसेच, प्रशासनाने वारंवार सूचना देऊन देखील पर्यटक अशा पद्धतीने स्टंट करत असतात.

त्यामुळे गोव्यात पर्यटनाच्या नावाखाली हुल्लडबाजी करणाऱ्या पर्यटकांना आळा कोण घालणार? असा प्रश्न सध्या स्थानिक उपस्थित करत आहेत.