डिचोली : तिलारीकडे गोवा सरकारने गांभीर्याने लक्ष घातले आणि महाराष्ट्र सरकारच्या सहकार्याने धरणातील जलसाठ्याची पातळी वेळचेवेळी नियंत्रित ठेवली तर तिलारी धरणापासून पुराचा धोका टळू शकतो, असे मत साळ-डिचोली येथील सामाजिक कार्यकर्ते मेघश्याम राऊत यांनी व्यक्त केले.

सरकारच्या निष्काळजीपणामुळेच गेली सलग तीन वर्षे आणि त्यापूर्वीही साळसह शापोरा नदीकाठच्या गावांवर पुराची आपत्ती कोसळली होती, अशी टीकाही त्यांनी केली. राऊत यांनी डिचोलीतील पत्रकारांसह शुक्रवारी सायंकाळी तिलारी धरणाला भेट देऊन धरण परिसराची पाहणी केली.

जलसाठ्याची पातळी नियंत्रित ठेवावी

सरकारने तिलारी पाटबंधारे विभागाच्या आणि जलस्रोत खात्याच्या अधिकाऱ्यांना विश्वासात घेऊन निदान पावसाळा जवळ येताच आणि पावसाळ्यात वेळोवेळी धरणाची पाहणी करून जलसाठ्याची पातळी नियंत्रित ठेवली तर पुरासारखी आपत्ती ओढवण्याचा धोका कमी होईल. त्याचबरोबर सरकारी यंत्रणेला धावपळ करावी लागणार नाही आणि शापोरा नदीकाठची जनताही भयमुक्त होईल, असे मत राऊत यांनी व्यक्त केले.

मुसळधार पावसामुळे तिळारी तुडुंब भरले असून, धरणातून जलविसर्ग सुरू झाला आहे. खबरदारीची उपाययोजना म्हणून चार दरवाजांतून पाणी बाहेर सोडण्यात आले आहे. 113.20 मीटर ही धरणातील जलसाठ्याच्या पातळीची क्षमता आहे. शुक्रवारी सायंकाळी 7 वाजेपर्यंत जलसाठ्याची पातळी 107.30 मीटर एवढी वाढली होती. मुसळधार पाऊस पडतच राहिल्यास मोठी आपत्ती ओढवण्याची शक्यता नाकारता येत नाही.