केपे: बहीण-भावाच्या नात्याला काळीमा फासणारी एक अत्यंत धक्कादायक घटना गोव्यातील केपे तालुक्यातील एका गावात उघडकीस आली. आपल्याच सख्या बहिणींवर गेल्या पाच वर्षांपासून सातत्याने लैंगिक अत्याचार करणाऱ्या एका २६ वर्षीय तरुणाविरोधात गुन्हा दाखल करण्यात आला आहे. विशेष म्हणजे, या नराधमाने केवळ एका बहिणीवर नव्हे, तर तिन्ही सख्या बहिणींवर अत्याचार केल्याचे समोर आले आहे.

रक्षाबंधनादिवशी बहिणीने फोडली 'त्या' अत्याचाराला वाचा

गेल्या पाच वर्षांपासून चाललेला हा मानसिक आणि शारीरिक छळ तिन्ही बहिणी सहन करत होत्या. मात्र, रक्षाबंधनाच्या दिवशी मोठ्या बहिणीने आपल्या मनात साचलेली ही वेदना एका कौटुंबिक मित्राजवळ व्यक्त केली.

त्यानंतर, त्या मित्राने तातडीने पीडितेला ॲडव्होकेट प्रतिमा कुतिन्हो यांच्याकडे नेले. ॲडव्होकेट कुतिन्हो यांनी पीडित तिन्ही बहिणींना सोबत घेऊन केपे पोलीस ठाण्यात धाव घेतली आणि आरोपीविरोधात तक्रार दाखल केली.

आरोपी फरार, पोलीस कसून तपास करत आहेत

पोलिसांनी या घटनेची गंभीर दखल घेत तात्काळ एफआयआर (FIR) दाखल केला आहे. एनजीओच्या मदतीने पीडित बहिणींचा जबाब नोंदवण्यात आला असून, फरार आरोपीचा शोध पोलीस घेत आहेत.

या घटनेने संपूर्ण गावात आणि समाजात संतापाची लाट उसळली आहे. बहीण-भावाच्या नात्याला कलंक लावणारी ही घटना अत्यंत निंदनीय असून, आरोपीला कठोर शिक्षा देण्याची मागणी जोर धरू लागली आहे.