काॅंग्रेस नेते पी. चिदंबरम यांनी खंत व्यक्त केली की गोव्यातील 67 टक्के लोकांनी भाजपच्या विरोधात मतदान केले असले तरी, मते वेगवेगळ्या दिशेने गेल्याने भाजप सत्ता मिळवू शकला. भाजप (BJP) नवीन काही देणार नाही, पण गेल्या दहा वर्षांची पुनरावृत्ती करेल. काँग्रेस युवा पिढीवर जबाबदारी सोपवत आहे. भारतातील 60 टक्के लोकसंख्या 40 वर्षांपेक्षा कमी वयाची आहे. आगामी दशकभर भारत हा तरुण देश राहील. आपण तरुण पिढीवर जबाबदारी सोपवली पाहिजे.

पुढे बोलताना ते म्हणाले की, जगभरातून नेतृत्वासाठी तरुण वर्ग पुढे येत आहेत. आपल्याला खंबीर राहण्याची गरज आहे आणि आता तरुण पिढीने जबाबदारी स्वीकारली पाहिजे आणि त्यांचे ध्येय साध्य होईपर्यंत संघर्ष केला पाहिजे.

प्रदेश काँग्रेसची (Congress) युवा टीम 2024 च्या लोकसभा आणि 2027 च्या विधानसभा निवडणुकांत दर्जेदार कामगिरी करेल. तसेच काँग्रेसच्या उज्ज्वल भवितव्यासाठी युवा नेत्यांनी संघटितपणे काम करावे, तसेच गिरीश चोडणकर (Girish Chodankar) यांनी कठीण काळात पक्षाचा डोलारा यशस्वीरित्या सांभाळल्याचे स्पष्ट केले आहे.

दरम्यान, केवळ मतविभागणीमुळेच काँग्रेसचा पराभव झाला आहे. 67 टक्के जनता भाजपविरोधात असल्याचे निकालातून उघड झाले आहे. नव्या टीमला पूर्ण सहकार्य करून काँग्रेसला पुन्हा बळकटी देऊया अस मत माजी प्रदेशाध्यक्ष गिरीश चोडणकर (Girish Chodankar) यांनी यावेळी मिरामार येथे बोलताना व्यक्त केले आहे.