गोव्यात नुकत्याच विधानसभा निवडणुका पार पडल्या आहेत. यावेळी देशातील अनेक पक्षांनी गोव्यात आपली ताकद आजमावली आहे. यामुळे गोव्यात राजकीय वातावरण चांगलेच तापल्याचे पाहायला मिळाले. अनेक नेत्यांनी आपला पक्ष बदलत दुसऱ्या पक्षात प्रवेश केले. आरोप-प्रत्यारोपाने ही निवडणूक चांगलीच गाजल्याचे गोवेकरांनी पाहिली.

अशातच आता कविता कांदोळकर यांनी तृणमूल काँग्रेसला रामराम ठोकला आहे. थिवीतील समर्थक सरपंच, उपसरपंच व पंचांनीही तृणमूल काँग्रेसला राजीनामा दिला आहे. पक्षाच्या कामगिरीवर नाराजी व्यक्त करत हा निर्णय घेतला आहे. तृणमूल काँग्रेसचे प्रदेशाध्यक्ष किरण कांदोळकरही लवकरच सोडचिठ्ठी देणार असल्याचे बोलले जात आहे.

दरम्यान, माजी मुख्यमंत्री आणि ज्येष्ठ काँग्रेस नेते प्रतापसिंग राणे यांच्या आजीवन कॅबिनेट पदाच्या दर्जाला आव्हान देणारी याचिका मुंबई उच्च न्यायालयाच्या गोवा खंडपीठाने दाखल करुन घेतली आहे. अॅड. आयरीश रॉड्रिग्स यांनी ही याचिका उच्च न्यायालयात दाखल केली असून याचिकेवर 2 मे रोजी सुनावणी होणार आहे.

माजी मुख्यमंत्री प्रतापसिंह राणे (Pratapsingh Rane) यांचा राजकारणातील अनुभव आणि राजकारणात 50 वर्षे पूर्ण केल्याने भाजप सरकारने 7 जानेवारी रोजी त्यांना आजीवन कॅबिनेट दर्जा देण्याची अधिसूचना जारी केली होती. ही अधिसूचना आणि राज्य सरकारचा (Goa Government) निर्णय घटनेचे उल्लंघन करणारा असल्याचा दावा ॲड. आयरिश रॉड्रिग्स यांनी करून तो रद्द करण्याची विनंती याचिकेत केली होती. याचिकेत रॉड्रिग्स यांनी राज्य सरकार आणि 83 वर्षीय प्रतापसिंह राणे यांना प्रतिवादी केले होते.