म्हापसा: आपल्या राहत्या घरी बेकायदेशीरपणे गांजाची लागवड केल्याप्रकरणी म्हापसा अतिरिक्त सत्र न्यायालयाने थिवी येथील रहिवासी एव्हरेस्टो डिसोझा याला दोषी ठरवून चार वर्षे, तीन महिने आणि एकोणतीस दिवसांच्या सक्तमजुरीची शिक्षा सुनावली आहे.

यासोबतच त्याला ५ हजार रुपये दंड ठोठावण्यात आला असून, दंड न भरल्यास पाच दिवसांची अतिरिक्त सक्तमजुरी भोगावी लागणार असल्याचे न्यायालयाने स्पष्ट केले. विशेष म्हणजे, आरोपीला सुनावलेली ४ वर्षे ३ महिने २९ दिवसांची शिक्षा ही त्याने आधीच तुरुंगात घालवलेल्या कालावधीशी मिळतीजुळती आहे. आरोपीने ३ जून २०२० पासून २ मार्च २०२१ पर्यंत आणि पुन्हा २८ सप्टेंबर २०२२ पासून आजतागायत तुरुंगवास भोगला आहे. हा कालावधी त्याच्या मुख्य शिक्षेतून वजा केला जाणार आहे. या प्रकरणाची पार्श्वभूमी अशी की, ३ जून २०२० रोजी म्हापसा पोलिसांनी थिवी येथे टाकलेल्या छाप्यात संशयिताला रंगेहाथ पकडले होते.

पुराव्यांमुळे ठरला दोषी!

खटल्यादरम्यान सरकारी पक्षाने १३ साक्षीदार तपासले. दुसरीकडे, बचाव पक्षाने आरोपीला खोट्या गुन्ह्यात अडकवल्याचा दावा करत सर्व आरोप फेटाळून लावले होते. मात्र, दोन्ही बाजूंचा युक्तिवाद आणि सादर केलेले पुरावे ग्राह्य धरून न्यायालयाने डिसोझा याला दोषी ठरवत ही शिक्षा सुनावली.