PM Narendra Modi On Congress Candidate Viriato Fernandes

दक्षिण गोव्याचे काँग्रेस उमेदवार विरियातो फर्नांडिस यांनी संविधानाबाबत केलेल्या आक्षेपार्ह वक्तव्याचे पडसाद देशात देखील उमटले आहेत. पंतप्रधान नरेंद्र मोदींनी विरियातोंचे व्यक्तव्य डॉ. बाबासाहेब आंबेडकर आणि संविधानाचा अपमान असल्याचे म्हटले आहे. मोदी भाजपच्या प्रचारसभेत बोलताना विरियातो यांच्या वक्तव्याचा उल्लेख केला, तसेच यावेळी त्यांनी राहुल गांधी यांचा 'शहजादा' असा उल्लेख केला.

पंतप्रधान नरेंद्र मोदी छत्तीसगढ येथील जांजगीर-चंपा येथे भाजपच्या प्रचारसभेत बोलत असताना त्यांनी काँग्रेसवर टीका केली. काँग्रेसने आणखी एक मोठी खेळी सुरु केली आहे. अगोदर कर्नाटकच्या एका खासदाराने दक्षिण भारताला वेगळा देश घोषित करु असे वक्तव्य केले.

आता गोव्यातील काँग्रेस उमेदवार गोव्यात भारतीय संविधान लागू होणार नाही, असे वक्तव्य करत आहेत. गोव्यावर संविधान लादण्यात आल्याचे ते म्हणत आहेत. आणि त्यांनी ही बाब काँग्रेसचे 'शहजादा' (राहुल गांधी) यांना सांगितली आहे. हा डॉ. बाबासाहेब आंबेडकर आणि संविधानाचा अपमान आहे की नाही? असा सवाल मोदींनी सभेत उपस्थित केला.

नरेंद्र मोदींनी यावेळी जम्मू काश्मिरचा दाखला देत तिथे देखील काही लोक असेच म्हणत होते. पण, लोकांनी मोदींना आशिर्वाद दिला आणि आता तेथील लोक संविधान मानत आहेत, असे मोदी म्हणाले.

काँग्रेस उमेदवाराने याबाबत नेत्याला सांगितले असून, कुठे ना कुठे काँग्रेसचे देखील या विचारला समर्थन असल्याचे दसून येते, असे मोदी म्हणाले. आज गोव्यात संविधान नाकारण्याची भाषा करत आहेत, पुढे संपूर्ण देशात डॉ. बाबासाहेब आंबेडकरांचे संविधान नाकारण्याचे पाप काँग्रेस करेल असे, मोदी सभेत म्हणाले.