पणजी: गोव्यात तिसरा जिल्हा होण्याची प्रक्रिया सुरु असल्याची माहिती राज्याचे मुख्यमंत्री डॉ. प्रमोद सावंत यांनी दिली. बुधवारी (०८ डिसेंबर) मंत्रिमंडळाच्या बैठकीनंतर माध्यमांना संबोधित करताना मुख्यमंत्री सावंत बोलत होते. गेल्या काही महिन्यांपासून तिसऱ्या जिल्ह्याची मागणी गोव्यात जोर धरत आहे.

पर्वरी येथील मंत्रालयात झालेल्या मंत्रिमंडळाच्या बैठकीत मुख्यमंत्री सावंत यांनी विविध क्षेत्रासाठी कंत्राट पद्धतीने भरण्यात येणाऱ्या पदांची माहिती दिली. तसेच, सरकारी नोकरी भरती प्रक्रिया सुरुच राहिल, असे सांगितले. राज्यात सुरु असलेल्या तिसऱ्या जिल्ह्याची मागणीवर त्यांना प्रश्न विचारण्यात आला. यावर त्यांनी तिसरा जिल्हा होणाराय, यासाठी प्रक्रिया सुरु आहे. मंत्रिमंडळाच्या मंजूरीनंतर तो अस्तित्वात येईल, असे मुख्यमंत्री सावंत म्हणाले.

राज्यात तिसऱ्या जिल्ह्याची मागणी वारंवार होत आहे. माजी मुख्यमंत्री व विद्यमान कृषीमंत्री रवी नाईक यांनी देखील याबाबत भाष्य केले होते. यासाठी ते आग्रही असल्याचे त्यांनी म्हटले होते. याशिवाय सभापती रमेश तवडकर आणि वीज खात्याचे मंत्री सुदीन ढवळीकरांनी देखील तिसऱ्या जिल्ह्याच्या स्थापनेबाबत सकारात्मकता दर्शवली होती. दरम्यान, आता खुद्द मुख्यमंत्री प्रमोद सावंत यांनी यावर भाष्य केल्याने तिसरा जिल्ह्याच्या स्थापनेबाबत आशावाद व्यक्त केला जात आहे.

राज्यात आदीवासीबहूल तिसरा जिल्हा असावा अशी मागणी अनेक वर्षापासून गोव्यात होत आहे. यासाठी मंत्री रवी नाईक आग्रही असल्याचे पाहायला मिळाले होते. सभापती रमेश तवडकरांनी देखील याला दुजोरा दिला होता. तिसऱ्या जिल्ह्याचे मुख्यालय काणकोण येथे असावे असा देखील एक प्रस्ताव समोर आला होता.

दक्षिण गोव्याचे विभाजन करुन तिसऱ्या जिल्ह्याच्या निर्मितीची मागणी होत आहे. सरकारने तिसऱ्या जिल्ह्याचा प्रस्तावा मांडल्यास काणकोण, सांगे, धारबांदोडा आणि केपे या तालुक्यांचा मिळून हा नवा जिल्हा अस्तित्वात येऊ शकतो.