पर्वरी- आबिर्णे -सुकुर येथील युनियन बँक ऑफ इंडियाचे काल रात्री अज्ञात चोरट्यांनी ‘एटीएम’ मशीन चोरून त्यातील अंदाजे १९.३८ लाख रुपये घेऊन लंपास झाले, अशी तक्रार शाखा व्यवस्थापक प्रभावती हेगडे यांनी पर्वरी पोलीस स्थानकात दिली आहे.

आबिर्णे-सुकुर येथील युनियन बँक ऑफ इंडियाच्या (पूर्वीची कॉर्पोरेशनन बँक) एटीएम खोलीत चोरट्यांनी प्रवेश करण्यापूर्वी  सीसीटीव्ही जोडणी तोडून टाकली. त्यानंतर आत प्रवेश केला. एटीएम मशीन जागेवरून काढले व घेऊन गेले. त्या चोरट्यांनी अंदाजे  दोनशे मीटर अंतरावर असलेल्या चर्चेच्या मागच्या बाजूच्या मैदानावर जाऊन ते मशीन फोडले. पोलिसांनी पंचनामा केला आहे. पोलिसांनी ठसे तज्ज्ञ, तसेच श्वानपथक घटना स्थळी पाचारण केले. अंदाजे  ३ / ४ चोरटे असू शकतात, असा अंदाज पोलिसांनी केला आहे. उपनिरीक्षक प्रतीक भट यांनी पंचनामा केला.