Goa Accidental Death: साळ नदीत तिसरे काढण्यास गेलेली तीन अल्पवयीन मुले आज सायंकाळी बेतुल येथील नदीत गेली असता दोघांना बुडण्यापासून वाचवले. मात्र, साईराज प्रदीप जोशी (11) हा मुलगा पाण्यात बेपत्ता झाला असून त्याचा शोध घेणे चालू आहे.

ज्या दोन मुलांचे प्राण वाचविण्यात यश आले त्यांची नावे आरव वाडेकर (11) व साईराज सावंत (14) अशी असून हे तिन्ही मुलगे तारीवाडा - बेतुल येथील असून आज सायंकाळी ते तिघेही ओहोटीवेळी तिसरे काढण्यासाठी नदीत उतरले होते.

तिसरे काढून झाल्यावर सायंकाळी 5 वाजण्याच्या सुमारास ते परतत असताना नदीतील पाणी भरतीमुळे अकस्मात वाढले आणि ही मुले गडबडून गेली. त्यांनी आरडाओरड केल्यानंतर नदीच्या तिरावर असलेल्या एका व्यक्तीने त्यांना पाहिले. यावेळी त्या व्यक्तीने प्रसंगावधान राखून त्याने आणखी दोघांना सतर्क करीत पाण्यात उडी घेत दोघांना नदीच्या काठावर आणले. मात्र, साईराज जोशी हा मुलगा पाण्यात वाहून गेल्याने बेपत्ता झाला.