पणजी: केंद्रीय निवडणूक आयोगाच्या निर्देशानुसार ज्येष्ठ नागरिक, अपंग व्यक्तींसाठी मतदान सोयीचे व्हावे या दृष्टिकोनातून संबंधित व्यक्तींच्या घरी जाऊन बॅलेटद्वारे मतदान करण्याची प्रक्रिया सुरू करण्यात आली आहे. बॅलेटद्वारे मतदान करण्यासाठी रविवारी अनेक ज्येष्ठ नागरिक (Senior Citizens) उत्सुक होते. मात्र, या प्रक्रियेदरम्यान लोकांना अनेक अडचणींचा सामना करावा लागला. (Goa Election 2022 News)

मतदान कर्मचार्‍यांना मतदारांच्या (Voters) तपशीलांची पडताळणी करणे, मताच्या गोपनीयतेसाठी कार्डबोर्ड विभाजन सेट करणे आणि बॅलेटवर मतदान कसे करावे याबद्दल स्पष्ट सूचना देणे, अशी अनेक कामे करावी लागत होती. "आम्हाला प्रक्रियेचे पालन करावे लागते. ही प्रक्रिया वेळखाऊ असून यात घाई करता येत नाही," असे मतदान कर्मचार्‍यांनी सांगितले.

ज्या लोकांना मतदानासाठी (Voting) रविवारी सकाळी 11 ची वेळ दिली होती. त्यापैकी अनेक लोकांना मतदानापासून वंचित रहावे लागले. बॅलेटद्वारे मतदान करण्याची प्रक्रिया वाळपई मतदारसंघात सुरू करण्यात आली आहे. सत्तरी तालुक्यातील ग्रामीण भागातील वय वर्ष 80 वरील ज्येष्ठ नागरिकांना या सुविधेचा लाभ मिळणार आहे.