Siolim Robbery Attempt Thief Attack Teenage Youth

म्हापसा: शिवोलीतील किशोरवयीन तरुणाने दाखवलेल्या धाडसामुळे एक चोराला रिकाम्या हातील पळ काढावा लागला. साई रेवाडकर असे धाडसी मुलाचे नाव असून तो तारचीभाट शिवोली येथे राहतो. त्याच्या धाडसाचे परिसरात कौतुक होत असले तरी दिवसाढवळा घडलेल्या या घटनेनं गोवा पोलिसांच्या कार्यक्षमतेवर प्रश्न उपस्थित केले आहेत

शनिवारी सकाळी 11:30 च्या सुमारास साई कॉलेजमधून घरी परतला. घरातल्या एका खोलीत हालचाल झाल्याचे त्याच्या लक्षात आले. तो खोलीत गेला असता सशस्त्र चोरट्याने त्याच्यावर हल्ला केला. चोरट्याच्या हल्ल्याने साई घाबरला नाही. त्यानेही चोरट्याला प्रतिकार केला.

साईने प्रतिकार केल्याने चोरट्याने शेवटी चाकूने त्याच्यावर हल्ला करण्याचा प्रयत्न केला. यात साईला दुखापत झाली पण तो मागे हटला नाही. त्याने चोरट्याला अक्षरश: सळो की पळो करून सोडले. त्याच्या धाडसामुळे शेवटी चोरट्याला माघार घ्यावी लागली आणि साईने चोरट्याचा हा डाव हाणून पाडला. साईने दाखवलेल्या धाडसाची सगळीकडे प्रशंसा केली जात आहे आणि सोबतच अशा चोर आणि दरोडेखोरांपासून स्थानिकांनी सतर्क राहण्याची गरज वाढली आहे.