Passport Issue In Goa: पोर्तुगालमध्‍ये जन्‍म नोंद झालेल्‍या लोकांच्‍या पासपोर्ट संदर्भातील मुद्दा तातडीने सोडवावा. ज्‍या 70 लोकांचे पासपोर्ट रद्द करण्‍यात आले, त्‍यांना न्‍याय द्यावा, अशी मागणी आज दक्षिण गोव्यातील नागरिकांनी केली.

सोमवारी दुपारी आझाद मैदान, पणजी येथे घेण्यात आलेल्या पत्रकार परिषदेत केनेडी अफोंसो म्हणाले, की पोर्तुगीज कायद्यानुसार, 19 डिसेंबर 1961 पूर्वी जन्मलेल्या गोमंतकीयांच्या तिसऱ्या पिढीपर्यंतच्या त्यांच्या वंशजांना पोर्तुगीज नागरिकत्वासाठी अर्ज करण्याचा कायदेशीर अधिकार आहे.

गोव्यातील अनेक लोकांनी विदेशातील रोजगाराच्या संधींसाठी कित्येक वर्षे लाभ घेतलेला आहे. विदेशी नागरिकत्व प्राप्त करणारे व्यक्ती स्वेच्छेने त्यांचे भारतीय नागरिकत्व काढून घेतात आणि हे नागरिकत्व मिळाल्यापासून निर्धारित कालावधीत त्यांचा भारतीय पासपोर्ट सुपूर्द करतात. आम्ही स्वेच्छेने आमचे भारतीय पासपोर्ट सुपूर्द करण्यासाठी गेलो होतो. मात्र पणजी येथील प्रादेशिक पासपोर्ट कार्यालयाने तो रद्द केला, असेही अफोंसो यांनी सांगितले.