फातोर्डा: 'डब्ल्युडब्ल्युई'चा चॅम्पियन द ग्रेट खली ने गोव्यात केलेल्या वक्तव्यामुळे वादाला तोंड फुटले आहे. फातोर्डात एका महिलेना सुरु केलेल्या स्पोर्ट्स शॉपचे उद्घाटन खलीच्या हस्ते पार पडले. यावेळी खलीने आमदार विजय सरदेसाई गोव्याचे मुख्यमंत्री डॉ. प्रमोद सावंत यांच्यापेक्षा पॉवरफूल असल्याचे व्यक्तव्य केले.

आंतरराष्ट्रीय महिला दिनाच्या निमित्ताने (०८ मार्च) फातोर्डात येथे लाविना रॉड्रिग्ज यांनी सुरु केलेल्या स्पोर्ट्स शॉपचे ग्रेट खलीच्या हस्ते उद्घाटन करण्यात आले. यावेळी स्थानिक आमदार विजय सरदेसाई यांनी देखील उद्घाटन कार्यक्रमाला हजेरी लावली होती. यावेळी मोठ्या संख्येने स्थानिक आणि महिलांनी देखील हजेरी लावली होती. उद्घाटन कार्यक्रमानंतर मनोगत व्यक्त करत असताना खलीने विजय सरदेसाई यांच्यावर स्तुतीसुमने उधळली.

"नव्याने उद्घान झालेल्या स्पोर्ट्स शॉपबद्दल मी सर्वांना शुभेच्छा देतो. गोव्यात येऊन तुम्हा लोकांना भेटता आले हे मी माझे भाग्य समजतो. स्थानिक आमदार विजय सरदेसाई खूप सक्रिय असतात. त्यांच्याबाबत मी खूप ऐकलं आहे. सरदेसाई गोव्याच्या मुख्यमंत्र्यांपेक्षाही पॉवरफूल आहेत", असे खली म्हणाला. खालीने केलेल्या वक्तव्यावरुन सरदेसाई देखील काहीकाळ अचंबित झाल्याचे दिसून आले.

दरम्यान, खलीने केलेल्या वक्तव्यावरुन भारतीय जनता पक्ष आक्रमक झाल्याचे दिसून येत आहे. "खली फक्त शरीराने उंच आहे, पण राजकारणात अपरिपक्व असल्याचे त्याच्या वक्तव्यातून दिसून येते. त्याचे वक्तव्य बालिशपणाचे आहे. मुख्यमंत्री किंग आहेत आणि त्यांची तुलना कोणशी होऊ शकत नाही", असे उत्तर भाजप अल्पसंख्यांक मोर्चा प्रभारी उरफान मुल्ला यांनी दिले आहे.