Goa Petrol Diesel Price

गोव्यात पेट्रोल - डिझेलच्या दरात वाढ होणार असून, राज्य सरकारद्वारे इंधनावर लावण्यात येणारा मूल्यवर्धित करात (Value Added Tax) वाढ केली आहे. यामुळे सामान्य गोमंतकीयांनी उद्यापासून (शनिवार, दि.22 जून) पेट्रोल - डिझेलसाठी अधिक पैसे मोजावे लागणार आहेत.

शनिवारपासून (22 जून) गोमंतकीयांना पेट्रोलसाठी एक रुपया तर डिझेलसाठी 36 पैसे अधिक मोजावे लागणार आहेत.

आजच्या (शुक्रवार, दि,२१ जून) ताज्या दरानुसार, उत्तर गोव्यात (पणजी) पेट्रोल 95.34 रुपये प्रतिलिटर आणि दक्षिण गोव्यात 95.41 रुपये प्रतिलिटर दराने विक्री होत आहे.

तर डिझेल राजधानी पणजीसह उत्तर गोव्यात 87.90 आणि दक्षिण गोव्यात 87.97 रुपये दराने विक्री होत आहे.

जागतिक बाजारपेठेतील कच्च्या तेलाच्या किमतीच्या आधारावर इंधनाचे दर ठरवले जातात. पण, राज्याद्वारे लागू होणाऱ्या विविध करांमुळे इंधनाच्या दरात बदल होत असतो.

पर्यटन राज्य म्हणून प्रसिद्ध असलेल्या गोव्या शेजारी महाराष्ट्र आणि कर्नाटक राज्याच्या तुलनेत जवळपास दहा रुपये कमी दराने पेट्रोल तर सात ते आठ रुपये कमी दराने डिझेल मिळत असते.