Anjuna Tourist Attack हणजूण येथील खासगी हॅटेलमध्ये उतरलेल्या पर्यटकांवर स्थानिक तरुणांकडून झालेल्या हल्ल्यात सहभागी असल्याच्या कारणावरून म्हापसा पोलिसांनी बुधवारी खोर्ली-म्हापसा येथील सलीम कासीम खान (41) याच्या मुसक्या आवळल्या.

संशयित सलीम खान म्हापसा-पणजी हमरस्त्यावरून जात असताना म्हापसा पोलिसांनी पाठलाग करून त्याला ताब्यात घेतले.

दरम्यान, हणजूण येथील खासगी हॅटेलात उतरलेल्या एकूण चार जणांच्या गटातील पर्यटकांवर गेल्या शुक्रवारी स्थानिक तरुणांच्या गटाकडून हा हल्ला करण्यात आला होता.

यासंबंधात पोलिस तक्रार करूनही पोलिसांकडून संशयितांना गजाआड करण्यात दिरंगाई केल्याचा ठपका ठेवत तक्रारदार पर्यटकांनी सोशल मीडियाचा उपयोग करीत ही घटना राज्यातील पोलिस महानिरीक्षकांपर्यंत पोहोचविली होती.

4 संशयित पोलिस कोठडीत

आतापर्यंत या मारहाण प्रकरणात सहभागी रॉयस्टन रेजिनाल्डो डायस, नायरॉन रेजिनाल्डो डायस, काशिनाथ ईश्वर आगरवाडेकर व जोजफ आलेक्स लोबो यांना पोलिसांकडून अटक करण्यात आली असून त्यांची रवानगी पोलिस कोठडीत करण्यात आली आहे.

दरम्यान, म्हापसा पोलिसांकडून बुधवारी अटक करण्यात आलेल्या संशयित आरोपी सलीम खान याच्या अटकेनंतर या हल्ला प्रकरणात आतापर्यंत पोलिसांकडून अटक करण्यात आलेल्यांची एकूण संख्या पाचवर गेली आहे.