मोरजी: मोपा विमानतळावरून पहिले उड्डाण 15 ऑगस्ट रोजी करण्याचा निर्णय मुख्यमंत्री डॉ. प्रमोद सावंत यांनी घेतल्यानंतर सध्या धावपट्टीवर विमान उड्डाण कसे होईल, आणि विमान कसे उतरले जाईल, शिवाय सिग्नल कसे मिळतील, याची सध्या प्रात्यक्षिके केली जात आहेत. ( The calibration test of Mopa airport has started )

दोन दिवसापासून मोपा विमानतळावरून एक विमान घिरट्या घालत असल्याचे अनेकांच्या निदर्शनात आले आहे. यासंदर्भात कंपनीचे शानभोगे यांच्याशी संपर्क साधला असता ते म्हणाले, की सध्या कॅलिब्रेशन चाचणी सुरू आहे. शिवाय विमान उड्डाण केल्यानंतर एखाद्या झाडामुळे अडथळा येतो, का सिग्नल मिळतात की नाही, याची पाहणी सुरू आहे.

स्थानिकांच्या नोकऱ्यांचा प्रश्न अद्याप प्रलंबितच

या प्रकल्पासाठी ज्या शेतकऱ्यांनी आपली जमीण या प्रकल्पासाठी दिली आहे. अशा शेतकऱ्यांना येथे नोकरी मिळणे अपेक्षित असताना त्या मिळत नसल्याचं आरोप स्थानिकांनी केला आहे. या पार्श्वभूमिवर मोपा विमानतळ प्रकल्पात आतापर्यंत दिलेल्या सुमारे पाचशे नोकऱ्या केवळ पेडणे तालुक्यातील व्यक्तींना दिल्या आहेत का ? अशी चर्चा सध्या पेडणे तालुक्यात सुरू आहे.

त्या नोकऱ्या बहुतांश प्रमाणात पेडणे तालुक्याच्या बाहेरील लोकांनाच देण्यात आल्याचा दावा या विमानतळासाठी जमीन गमावलेल्या शेतकऱ्यांनी केला आहे. या पार्श्वभूमीवर या शेतकऱ्यांचा प्रश्न अद्याप प्रलंबितच आहे.