गुळेली: आज पाचव्या दिवशीही मेळावलीवासीयांचे आंदोलन (Agitation) सुरुच असून महिलांची मोठ्या प्रमाणात उपस्थिती आज लाभली होती. पंच ,सरपंच कोणीही पंचायत कार्यालयात फिरकत नसून पंचायत सचिव तसेच लिपिक सुट्टीवर असल्याची माहिती मिळाली आहे.

सध्या पंचायतीमध्ये एकमेव शिपाई दररोज उपस्थित राहत आहे.दरम्यान काल पासून आंदोलनकर्त्या तर्फे बिडीओ कार्यालयाशी संपर्क साधण्याचा प्रयत्न होत होता त्यात त्यांना उद्या 24 रोजी पंचायत सचिवांच्या बदलीवर कुणाला तरी पाठवण्यात येणार असल्याचे कळविण्यात आले होते अशी माहिती आंदोलनातील विठू नाईक यांनी दिली. पण आज दुपारीच पंचायती मध्ये बदली सचिव पाठवण्यात आला.त्याच्याशी आंदोलन समितीच्या सदस्यांनी चर्चा करुन आपल्या मागण्या सादर केल्या आहे यावर सदर बदली सचिव काय निर्णय घेतात याकडे आंदोलनकर्त्या चे लक्ष लागले आहे की 19 डिसेंबर प्रमाणे सदर सचिवही एका दिवसाचाच ठरेल का? असा प्रश्न आंदोलन समितीच्या वतीने उपस्थित करण्यात आला आहे.

गुळेली पंचायतीच्या सचिवाकडे अन्य एका पंचायतीची जबाबदारी आहे त्यामुळे त्यांच्या जागेवर 19 रोजी असलेल्या ग्रामसभेवेळी दुसऱ्या ठिकाणच्या सचिवांना पाठवण्यात आले होते आणि आज या पंचायतीचे सचिव रजेवर असल्याने त्यांच्या जागी तिसराच माणूस पाठवण्यात आला आहे.त्यामुळे हा सर्व काय प्रकार आहे हे कळण्यास वाव नाही अशी प्रतिक्रिया मेळावली ग्रामस्थांनी दिली आहे. आज महिलांनी पंचायत कार्यालयात असलेल्या शिपायाला एकूण पंच, सरपंच, सचिव , लिपिक यांच्या गैरहजरीविषयी विचारलं असता आपणाला काही माहित नसल्याचे त्यांनी सांगितले.