Mapusa Municipality: सेवा नियमांचे उल्लंघन केल्याप्रकरणी म्हापसा नगरपालिकेच्या एका रोजंदारी कचरावाहू चालकाविरुद्ध सेवासमाप्तीची कारवाई करण्यात आली. यासंदर्भात पालिका मुख्याधिकारी अमितेश शिरवईकर यांनी आदेश काढला. दुर्गाप्पा तलवार असे कामावरुन काढलेल्या या चालकाचे नाव आहे.

या कामगाराने सेवा व नगरपालिका नियमांचे उल्लंघन केल्याचे चौकशीत आढळल्याने त्यास कामावरुन काढल्याची माहिती मुख्याधिकारी अमितेश शिरवईकर यांनी दिली.

उपलब्ध माहितीनुसार, 20 डिसेंबर 2022 रोजी सदर चालक हा म्हापसा पालिका कार्यक्षेत्र सोडून कोलवाळ पंचायत क्षेत्रातील एका भंगारअड्ड्यामधील कचरा बेकायदेशीरपणे उकल करत होता.

या रोजंदारी चालकाने पालिकेचा कचरावाहू टीप्पर ट्रक (जीए 03 के 2200) ए.के. इंटरप्रायझच्या आवारात उभा केला असता, म्हापसा उपनगराध्यक्ष चंद्रशेखर बेनकर, नगरसेवक विराज फडके व साईनाथ राऊळ या तिघांनी मिळून या संशयित चालकास कचरावाहू वाहनासह घटनास्थळी रात्रीच्या वेळी रंगेहाथ पकडले होते.

सेवा नियमाचे उल्लंघन

मुख्याधिकाऱ्यांनी संपूर्ण प्रकरणाचा पंचनामा करुन नंतर चौकशी केली. यात चालकाने पालिका कायद्यानुसार सेवा नियमांचे उल्लंघन केल्याचे स्पष्ट झाले. त्यानुसार मुख्याधिकाऱ्यांनी सदर रोजंदारी चालकाविरुद्ध सेवासमाप्तीची कारवाई केली.

कारण ट्रीपमधून येणारा महसूल हा थेट चालकाच्या खिशात जात होता. तसेच बेकायदेशीरपणे हा कचरा उचल करून हा संपूर्ण कचरा नंतर म्हापसा पालिकेच्या प्रकल्पात आणून टाकायचा.