Sonali Phogat Case : सोनाली फोगट मृत्यूप्रकरणी सीबीआय पथकाने काल रविवारी फॉरेन्सिक तज्ज्ञ अधिकाऱ्यांसह हणजूण येथील कर्लिस बीच शॅक रेस्टॉरंटला भेट दिली. तेथे सोनाली बेशुद्धावस्थेत होत्या, त्या जागेची कसून पाहणी केली. ‘कर्लिसॅचा चालक एडविन नुनीस व काही कर्मचाऱ्यांची चौकशी करत जबानी नोंदवल्या. यानंतर पथकाने पुन्हा द ग्रँड लिओनी रिसॉर्टवर जाऊन मिळालेल्या माहितीच्या आधारे तपासप्रक्रिया सुरू केली.

सीबीआयने शनिवारी दिवसभर ‘लिओनी’ रिसॉर्टमध्ये सोनाली तसेच सांगवान व सुखविंदर सिंग वास्तव्यास असलेल्या 3 खोल्यांची बारकाईने तपासत सील केल्या. त्यानंतर काल रविवारी सकाळी पथकाने ‘कर्लिस’कडे मोर्चा वळविला. दोन तास या शॅकच्या शौचालयात ज्या ठिकाणी सोनाली या बेशुद्धावस्थेत पडून होत्या त्या जागेची पाहणी केली. त्यावेळी उपस्थित असलेल्या कर्मचाऱ्यांची कसून चौकशी केली.

संशयितांना पोलिस कोठडीची शक्यता

सोनाली यांच्यासोबत गोव्यात आलेला त्यांचा पीए सुधीर सांगवान व सुखविंदर सिंग सध्या न्यायालयीन कोठडीत आहेत. सीबीआयने नव्याने तपास सुरू केल्याने त्यांच्या चौकशीसाठी पोलिस कोठडीसाठी हे पथक न्यायालयात अर्ज करण्याची शक्यता आहे.

अधिकाऱ्यांसमोर आव्हान

गेल्या दोन दिवसांमध्ये सीबीआयने गोवा पोलिसांनी ज्या तपासकामात त्रुटी ठेवलेल्या आहेत, त्याची माहिती जमा करण्याचा प्रयत्न करत आहेत. सोनालींच्या मृत्यूमागील कारण अजूनही स्पष्ट झालेले नाही. त्यामुळे त्याचा तपास हे पथक करत असल्याचे सूत्राने सांगितले.