पणजी: केंद्रीय निधीतून राबवण्यात येणारे कार्यक्रम व योजना यांच्यावर देखरेख व समन्वयासाठी खासदार विरियातो फर्नांडिस यांच्या अध्यक्षतेखाली समिती नेमण्यात आली आहे. खासदार सदानंद शेट तानावडे हे समितीचे सहअध्यक्ष आहेत. या समितीवर महिला प्रतिनिधी म्हणून तारा केरकर यांची नियुक्ती केली आहे.

दक्षिण गोव्यातील सर्व आमदार, दक्षिणेतील सर्व पालिकांचे अध्यक्ष, दक्षिण गोवा जिल्हा पंचायतीचे अध्यक्ष, दक्षिण गोवा जिल्हा पंचायतीचे मुख्य कार्यकारी अधिकारी आणि विविध खात्यांचे संचालक मिळून १२ शासकीय सदस्य या समितीवर आहेत.

दक्षिण गोवा जिल्हाधिकारी हे सदस्य सचिव असून या समितीवर बेतुलचे सरपंच प्रीतम कार्दोज, रायचे सरपंच पीटर क्वाद्रोज, नुवेच्या सरपंच फ्रिडा डिसा, वेळसावच्या सरपंच मारिया डायना गोवेया, बिगर सरकारी संस्थेचे प्रतिनिधी म्हणून उतोर्डा येथील गोयचो एकवटचे विवेकानंद कंटक, अनुसूचित जातींचे प्रतिनिधी म्हणून अवेडे येथील यतीश परवार, आदिवासींचे प्रतिनिधी म्हणून खोतीगावचे उमेश गावकर यांची सदस्य म्हणून नियुक्ती करण्यात आली आहे. तिमाही पद्धतीने या समितीची बैठक होणार आहे.