Tanvi Vasta, Central Bank Of India's Manager Arrested In Goa

केपे: कुडचडेत ज्येष्ठ नागरिकांची फसवणूक करून घोटाळा केल्याप्रकरणी कुडचडे पोलिसांनी तन्वी वस्त तसेच सेंट्रल बँकेचा व्यवस्थापक आनंद जाधव या दोघांना अटक केली असून त्यांना केपे न्यायालयापुढे हजर केले असता दोन दिवसांची पोलिस कोठडी सुनावली आहे.

वर वर किरकोळ वाटणाऱ्या या प्रकरणाची व्याप्ती कोट्यवधींमध्ये व्यापलेली आहे. तन्वी वस्त हिच्याविरोधात आणखी तक्रारी दाखल होऊ लागल्या असून तिच्यासमोरील अडचणी वाढल्या आहेत. काल (ता. २५) रोझालिना डायस, (रा. व्हडलेमळ-काकोडा) यांनी तन्वी वस्त हिच्या विरोधात, सेंट्रल बँकेत बोलावून सुमारे २५ लाखांच्या सोन्याच्या वस्तू बदलून त्याऐवजी बनावट दागिने बँकेत ठेवून फसवणूक केल्याची तक्रार दाखल केली होती.

तसेच आणखी एकाने आपले ५,५००० रुपये हडप केल्याची तक्रार दाखल केली होती. त्यानुसार पोलिसांनी तन्वीला अटक केली होती. या प्रकरणात बँक मॅनेजर आनंद जाधव हासुद्धा सहभागी असल्याने काल रात्री त्याला पोलिसांनी अटक केली होती.

तन्वीच्या सौंदर्याची अनेकांना भुरळ

लोकांना लाखो रुपयांना ठकविणाऱ्या तन्वी वस्तने ‘‘पीपल्स विल ऑलवेज बिलिव्ह इन समथिंग, विदाऊट प्रूफ जस्ट टू फिड देयर क्युरियॉसिटी’’ अशा आशयाची साळसूदपणाची पोस्ट समाज माध्यमावर टाकली आहे.

लोकांना बरोबर जोखणाऱ्या तन्वी वस्तने आपल्या सौंदर्याच्या बळावर प्रशासनापासून सर्वसामान्यांपर्यंत सर्वांनाच अशी काही भुरळ घातली की, लाखो-कोट्यवधी रुपयांना लुबाडण्यात ती यशस्वी ठरली. मंगळवारी सायंकाळी आणखी दोन महिलांनी तिच्याविरोधात तक्रार नोंदविली.