पणजी: गोव्यातील आरोग्य खात्यात मोठ्या प्रमाणावर गैरप्रकार उघडकीस आल्याने, विभागातील 6 जणांवर निलंबनाची प्रक्रिया सुरू असल्याची माहिती आरोग्यमंत्री विश्वजीत राणे यांनी दिली आहे. यामध्ये 2 आरोग्य निरीक्षक आणि 4 स्वच्छता निरीक्षकांचा समावेश असून, भ्रष्टाचार तसेच नागरिकांना ब्लॅकमेल करण्याच्या प्रकारांमध्ये त्यांचा सहभाग असल्याचा ठपका ठेवण्यात आला आहे.

विश्वजीत राणे यांनी दिलेल्या माहितीनूसार, या अधिकाऱ्यांची नावे येत्या आठवड्यात जाहीर केली जातील. आरोग्य विभागातील 6 कर्मचाऱ्यांवर निलंबनाची प्रक्रिया सुरू असल्याचं त्यांनी सांगितलं.

विशेष म्हणजे, अन्न सुरक्षा निरीक्षक विश्वासराव राणे यांच्याविरोधात अनेक तक्रारी प्राप्त झाल्या असून, त्यांच्यावर आधीच निलंबनाची कारवाई करण्यात आली आहे. यावर सविस्तर चौकशी सुरू असून अहवाल पूर्ण झाल्यानंतर तो सार्वजनिक केला जाईल, असं विश्वजीत राणेंनी स्पष्ट केलं.

भ्रष्ट अधिकाऱ्यांविरुद्ध कठोर पावले उचलली जातील. शासन कोणत्याही प्रकारच्या भ्रष्टाचाराला पाठीशी घालणार नाही, असेही राणे यांनी सांगितलंय.

आरोग्य खात्यात सुरू असलेल्या धडक कारवाईमुळे इतर कर्मचार्‍यांमध्येही खळबळ उडाली आहे. सरकारकडून खात्यातील कार्यपद्धती पारदर्शक करण्यासाठी पुढील काही दिवसांत आणखी कारवाई होण्याची शक्यता आहे.