गेल्या चार दिवसांपासून गोव्यात गाजत असलेल्या आसगाव घर मोडतोड प्रकरणाने नवे वळण घेतले असून, निलंबित करण्यात आलेल्या हणजूण पोलिसांनी राज्याच्या पोलिस महासंचालकांवर गंभीर आरोप केले आहेत.

कारावाईसाठी पोलिस महासंचालकांचा दबाव होता असा खळबळजनक खुलासा पोलिसांनी मुख्य सचिवांकडे सादर केलेल्या अहवालातून केला आहे. यावरुन आता विरोधक चांगलेच आक्रमक झाले असून डिजीपींच्या निलंबनासह त्यांना सहआरोपी करण्याची मागणी होत आहे.

आसगाव प्रकरणात हणजूण पोलिस निरीक्षक प्रशल देसाई, उप-निरीक्षक नितीन नाईक आणि संकेत पोखरे यांना निलंबित करण्यात आले. मुख्य सचिवांना सादर केलेल्या अहवालाच्या चौकशीअंती ही कारवाई करण्यात आली.

दरम्यान, पोलिसांनी मुख्य सचिवांना सादर केलेल्या अहवालात प्रशल देसाई यांनी धक्कादायक खुलासे केले आहेत. त्यांच्यावर आसगाव येथील कारवाईसाठी पोलिस महासंचालकांचा दबाव होता, तसेच कारवाई थांबवली म्हणून त्यांनी आरडाओरड केली असेही त्यांनी या अहवालात म्हटले आहे.

कारवाई थांबवल्यानंतर डिजीपींना पणजीत बोलवून माझ्यावर खोट्या एनडीपीएस गुन्ह्यात अडकविण्याची धमकी देखील असे पोलिसांनी मुख्य सचिवांकडे सादर केलेल्या अहवालात म्हटले आहे. यामुळे आता पोलिस महासंचालक वादाच्या भोवऱ्यात सापडले आहेत.

कोण काय म्हणाले?

पोलिस महासंचालक जसपाल सिंग यांना निलंबित करुन त्यांची या प्रकरणात सह-आरोपी म्हणून नोंद करावी, अशी मागणी काँग्रेसचे नेते सुनील कवठणकर यांनी केली आहे. असे न केल्यास केंद्रीय गृह खात्याला पत्र लिहणार असल्याचे कवठणकर म्हणाले.

तर, गोव्याच्या पोलिस खात्यावरील विश्वास आता उडालेला असून, ते आता अधिकृत सुपारी घेणारे खाते झाले आहे‌, असा आरोप विजय सरदेसाई यांनी केला.

उत्पल पर्रीकर यांनी देखील जसपाल यांच्या ट्विटवर खडे बोल सुनावताना ट्विट करुन पोलिसांवरील उडालेला विश्वास पुन्हा येणार नाही त्यासाठी प्रत्यक्षात कारवाई करावी लागेल, असे उत्पल म्हणाले.

'पोलिस महासंचालकांचा सहभाग हे तर हिमनगाचे टोक आहे. भाजप ते महासंचालक या लिंकचा पण तपास व्हायला हवा. रिअल इस्टेट माफियाना भाजप संरक्षण देत आहे. मुख्यमंत्री मीडियाच्या प्रश्नांना का टाळतायेत? निवृत्त न्यायाधीशांच्या नेतृत्वाखाली चौकशी गरजेची आहे,' असे विरोधी पक्षनेते युरी आलेमाव यांनी म्हटले आहे.