Panaji: मांडवी पुलावर पेटत्या कारचा थरार! आगीच्या भडक्यात दर्शनी भाग जळून खाक; शॉर्टसर्किट झाल्याचा संशय

Panaji Mandovi Bridge Car Fire Incident

पणजी: पणजीतील नव्या मांडवी पुलावर आज संध्याकाळी पावणेसातच्या सुमारास चालत्या कारने अचानक आगीने पेट घेतला. या आगीत कारचा दर्शनी भाग जळाला. या घटनेमुळे पुलावर वाहनांचा लांबच्या लांब रांगा लागून वाहतुकीची कोंडी झाली.

अग्निशमन दलाच्या जवानांनी कारला लागलेली आग विझविली. मात्र, बरेच नुकसान झाले आहे. ही आग शॉर्ट सर्किटमुळे लागली असल्याचा संशय वर्तवण्यात येत आहे. कारचा चालक प्रसंगावधान राखून वेळीच बाहेर पडल्याने तो बचावला.

पर्वरीहून पणजीच्या दिशेने एक कार मांडवी पुलावरून येत होती. पुलाच्या मध्यभागी पोहचल्यावर कारच्या इंजिनमधून धूर येऊन अचानक आगीने पेट घेतला व आग भडकली. कारच्या चालकाने गाडी त्वरित थांबवली व तो त्यातून बाहेर आला.

या आगीमुळे दोन्ही बाजूने ये जा करणाऱ्या वाहनांची रांग लागली. या घटनेची माहिती अग्निशमन दलाच्या जवानांना देण्यात आली. घटनास्थळी पोहचताच ही आग आटोक्यात आणण्यात आली तोपर्यंत कारचा दर्शनी भाग जळाला होता.