मडगाव: जास्त परतावा देण्याचे आमिष दाखवून सुमारे २०.८३ कोटी रुपयांचा घोटाळा केल्याप्रकरणी फरार असलेल्या मायरन रॉड्रीगीस विरुद्धच्या खटल्याची सुनावणी सुरू झाली असून याच प्रकरणातील अन्य एक संशयित सुनीता रॉड्रिग्ज हिच्याविरुद्ध अटक वॉरंट जारी करण्याचा आदेश न्यायालयाने दिला आहे.

मडगाव येथील दक्षिण गोवा जिल्हा अतिरिक्त सत्र न्यायाधीश सुधीर शिरगावकर यांच्या न्यायालयात या खटल्याची सुनावणी झाली. संशयित मायरन न्यायालयात गैरहजर, तर सुनीता भगवंत तन्नाई ऊर्फ सुनीता रॉड्रिग्ज आणि संशयित दीपाली परब ऊर्फ रुक्मिणी नाईकही गैरहजर होत्या.

मात्र, काही वेळाने दीपाली परब यांच्या वकिलांनी त्यांना न्यायालयात गैरहजर राहण्यास अनुमती मागितली, तेव्हा न्यायालयाने एका दिवसासाठी ही अनुमती दिली. मात्र, संशयित सुनीता या न्यायालयात गैरहजर असल्याचे पाहून न्यायालयाने तिच्याविरुद्ध अटक वॉरंट जारी करण्याचा आदेश दिला.

आपण गुंतवणूक सल्लागार असल्याचे भासवून शेअर बाजारात गुंतवणूक केल्यास मोठ्या प्रमाणात परतावा देऊ, असे सांगून या प्रकरणातील वरील तीन संशयितांनी अनेक गुंतवणूकदारांकडून सुमारे २०,८३,९०,३२६ रुपये इतकी रक्कम जमा केली होती आणि नंतर गुंतवणूकदारांच्या तोंडाला पाने पुसली, असे आरोपपत्रात म्हटले आहे.

बँकेत धनादेश वटलेच नाहीत!

संशयित मायरन याने काही गुंतवणूकदारांना धनादेश दिले होते. मात्र, बँकेत अपुरा निधी असल्यामुळे हे धनादेश वटले नाहीत. वरील संशयितांनी अनेक गुंतवणूकदारांची फसवणूक केली, असे आरोपपत्रात म्हटले आहे.