Sunburn Music Festival Goa: जगभरातील संगीत महोत्सवांच्या पहिल्या तीन क्रमांकांच्या यादीत स्थान असलेला 'सनबर्न' यंदा अधिकच वादाच्या भोवऱ्यात सापडला. त्यातच सनबर्नचे आयोजक हरिंद्र सिंग यांनी 2023 वर्षातला महोत्सव त्यांचा शेवटचा असल्याचे सांगितले. सोशल मीडियावर पोस्ट करत त्यांनी ही माहिती दिली आहे. त्यांच्या या पोस्टनंतर अनेक चर्चा सुरू झाल्या आहेत.

''डिसेंबर 2023 मधला गोव्यातला हा माझा शेवटचा सनबर्न. हा प्रवास इथेच संपतो... यामध्ये मी अनेकांचा आभारी आहे. या प्रवासात खूप कष्ट, भावना आणि बऱ्याच गोष्टींचा समावेश आहे. मी मागील इतकी वर्षे या कार्यक्रमाचे आयोजन करू शकलो याचा मला आनंद आहे. पण पुन्हा मी ते करू शकणार नसल्याचे दु:खही आहे.'' असे त्यांनी सोशल मीडिया प्लॅटफॉर्म इन्स्टाग्रामवर लिहिले आहे.

त्यांच्या या पोस्टवर अनेकांनी दु:ख व्यक्त केले. त्यांच्या या निर्णयामागे नेमके काय कारण आहे, हे कळू शकले नाही.

इथे पहा इन्स्टाग्राम पोस्ट :

यंदाच्या सनबर्नचे काय?

गेल्यावर्षी 12 वाजेपर्यंत संगीत वाजवण्यास परवानगी देण्यात आली होती. मात्र यंदा निर्बंध वाढवून फक्त 10 वाजेपर्यंत परवानगी देण्यात आली. यामुळे खास सनबर्नसाठी म्हणून गोव्यात येणाऱ्यांचा हिरमोड झाला. याचा फटका महोत्सवालाही बसला असल्याचे बोलले जात आहे.

त्यामुळे आधीच वादाच्या भोवऱ्यात अडकलेला सनबर्न त्यात आयोजकांंनी हा निर्णय घेतल्याने यावर्षी म्हणजेच 2024 मध्ये होणाऱ्या महोत्सवाबाबत प्रश्नचिन्ह उभे राहिले आहे.