"2008 साली बाबूश मोन्सेरात हे सरकारच्या विरोधात होते आणि त्यांचा आणि त्यांच्या समर्थकांच पोलीसांच्या कारभारात सतत हस्तक्षेप चालू असायचा, त्यामुळेच पणजी पोलिसांशी त्यांचे संबंध ताणलेले होते," अशी साक्ष पणजीचे तत्कालीन निरीक्षक आणि सध्याचे उपअधीक्षक सुदेश नाईक यांनी दिली.

आजच्या सुनावणीस बाबूश आणि त्यांची पत्नी जेनीफर मोन्सेरात हे आरोपीच्या पिंजऱ्यात उभे होते. मात्र माजी महापौर टोनी रॉड्रिग्ज आणि उदय मडकईकर हे गैर उपस्थित होते. आपण निरीक्षक असताना वेगवेगळ्या प्रकरणात आपण मोन्सेरात यांच्या समर्थकांना अटक केली होती असेही नाईक यांनी सांगीतले.

19 फेब्रुवारी 2008 रोजी हा कथित हल्ला झाला होता. बाबूश मोन्सेरात यांच्या काही समर्थकांना अटक केली होती. त्यांना सोडवा अशी मागणी करण्यासाठी बाबूश मोन्सेरात आणि त्यांचे समर्थक पोलीस स्थानकावर चाल करून आले होते.

नाईक यांची तपासणी अर्धवट राहिल्याने आता ती 17 मार्चलापुढे चालू राहणार आहे. 17 मार्च रोजी बाबूश मोन्सेरात यांच्या विरुद्धच्या अल्पवयीन बलात्कार प्रकरणाचीही सुनावणी होणार आहे.

मोव्हीन गुदीन्हो प्रकरणाची सुनावणीही तहकूब

पंचायत मंत्री मोव्हीन गुदीन्हो यांच्या विरुद्ध चालू असलेल्या विज बिल सवलत घोटाळा प्रकरणाची आजची सुनावणी पुन्हा एकदा साक्षीदार नसल्याने पुढे ढकलण्यात आली. आता ही सुनावणीही 17 मार्च रोजी होणार आहे.