राज्यात सध्या दूधसागर पर्यटन हंगामाच्या मुद्यावरुन वातावरण चांगलंच तापलं आहे. काल (29 ऑक्टोबर) सत्ताधारी भाजपमधील दोन नेते दूधसागर पर्यटन हंगामाच्या मुद्यावरुन आमनेसामने आले. दूधसागर असोसिएशनचा वाद मिटवण्यात स्थानिक आमदार आणि जीटीडीसीचे अध्यक्ष डॉ. गणेश गावकर अपयशी ठरल्याचा घणाघात सावर्डे भाजप मंडळाचे अध्यक्ष विलास देसाई यांनी केला. यावरच आता जीटीडीसी आणि गोवा टुरिझमने गोव्यातील व्यवसाय संपवल्याची टीका सुदीप ताम्हणकर यांनी केली.

ताम्हणकरांचा हल्लाबोल

मुख्यमंत्र्यांनी दूधसागर जीप टूर ऑपरेटर्सची भेट घेतली आणि त्यांना GTDC सह पर्यटन सुरु करण्यास सांगितले. एवढचं नाहीतर कोणत्याही प्रकारची अडचण आल्यास महिन्याभरात जीटीडीसी काउंटर बंद करण्याचे आश्वासन देखील त्यांनी दिले. या सगळ्यावर ताम्हणकर यांनी हे टीकास्त्र डागलं. ताम्हणकर म्हणाले की, ''मुख्यमंत्री डॉ. प्रमोद सावंत आणि स्थानिक आमदार गणेश गावंकर यांनी तात्काळ हा वाद मिटवून पर्यटन हंगामास सुरुवात करावी.''

पूर्णवेळ पर्यटन रोजगार देण्याचे प्रयत्न

दूधसागर तसेच इतर परिसरात पर्यटनाच्यादृष्टीने कायमस्वरुपी रोजगार उपलब्ध करण्यासाठी सरकार कार्यरत आहे. मुख्यमंत्री डॉ. प्रमोद सावंत यांनी या मतदारसंघाच्या विकासासाठी आणि हितासाठी अनेक निर्णय घेतले असून पर्यटनात वृद्धी व्हावी यासाठी सरकार कार्यरत आहे. त्यामुळे कुणीही चुकीची विधाने करुन येथील टूर ऑपरेटर तसेच तत्सम घटकांमध्ये संभ्रम निर्माण करु नये याकडे लक्ष ठेवावे, असे आमदार गणेश गावकर यापूर्वी म्हणाले होते. शेवटी पूर्णवेळ पर्यटन रोजगार देण्यासाठी सरकार प्रयत्नशील असून भाजप सरकार त्यासाठी सक्षम असल्याचेही गावकर म्हणाले होते.

जीटीडीसीचा हस्तक्षेप नको

दूधसागर धबधबा (Dudhsagar Waterfall) पर्यटन व्यवसायाची वेबसाईट आहे, ती आमची वेबसाईट आम्हांला परत द्यावी. या ठिकाणी जीटीडीसीचा हस्तक्षेप नको. सरकारला जो काही कर आहे, तो आम्ही भरण्यास तयार आहे, असे जीप टूर ऑपरेटर्सनी सांगितले. आम्हांला जीटीडीसीचा हस्तक्षेप नको, आम्हांला आपण सहकार्य करावे, अशी मागणी अध्यक्ष नीलेश वेळीप आणि असोसिएशनच्या पदाधिकाऱ्यांनी केली.