Sancoale: पोर्तुगीजांनी उद्ध्वस्त केलेल्या गोव्यातील मंदिरांच्या पुनर्बांधणीसाठीच्या स्थळांची शिफारस करण्यासाठी सरकारने पाचजणांची समिती स्थापन करण्याचा निर्णय घेतला आहे. सरकारच्या या निर्णयावर सुभाष वेलिंगकर यांनी टिका करत सरकारला फटकारले आहे.

वेलिंगकर म्हणाले, "मंदिरांच्या पुनर्बांधणीसाठीच्या निर्णयाचे स्वागत करतो. मंदिरे उध्वस्त करून पोर्तुगीजांनी चर्च बांधले. मंदिरांच्या पुनर्बांधणीबद्दल बोलण्यापेक्षा सरकारने आधी सांकवाळची संरक्षित वारसा स्थळ असलेली श्री विजयादुर्गा देवीच्या मंदीराची जमीन मोकळी करून द्यावी" अशी मागणी सरकारकडे केली आहे.

काही महिन्यांपूर्वी वेलिंगकर यांनी पत्रकार परिषद घेत या प्रकरणावर भाष्य केले होते. ते म्हणाले होते, "पोर्तुगीजांनी गोव्यातील मंदिरे उध्वस्त करून चर्च बांधले. पोर्तुगीजांनी मंदिरे उध्वस्त करून चर्च न बांधलेल्या राज्यात आता फक्त दोनच जागा रिकामी आहेत."

"एक म्हणजे वेर्णा सासष्टी वरण्यपुरी येथील श्री महालसा मंदीर उध्वस्थ झालेले होते. पण तेथे हिंदु भावीकांनी मंदीर पुन्हा स्थापन केले. दुसरी म्हणजे सांकवाळची श्री विजयादुर्गा देवीचे मंदीर. या मंदीराच्या जागेवर गेली 10 वर्षे चर्च संस्थेकडून अतिक्रमण चालू आहे".

"पुरातत्व विभागाच्या ताब्यात असलेल्या या जागेत बेकायदेशीर धंदे सुरु आहेत. याची दखल कोणीही घेत नाही आहे. मंदीरासमोरील तळंही उध्वस्थ करण्यात आले आहे. चर्च संस्थेकडून सरकारद्वारे वाममार्गाने दबाव आणून ही अवैध कामे करण्यात येत आहेत" असा सरकारवर त्यांनी आरोप केला होता.