काणकोण: पैंगीण पंचायत क्षेत्रातील सागरी कासवांसाठी आरक्षित असलेल्या गालजीबाग किनाऱ्यावर जोरदार लाटांच्या तडाख्याने सुरूची १२ झाडे उन्मळून पडली. यापूर्वी या किनाऱ्यावर २००९ साली जोरदार लाटांमुळे सुरूची सुमारे ५० झाडे उन्मळून पडली होती.

त्यानंतर तौक्ते वादळ झाले, तेव्हाही सुरूची झाडे उन्मळून पडून किनाऱ्याची मोठ्या प्रमाणात झीज झाली होती. ही झीज अशीच सुरू राहिल्यास येथूनच जवळ असलेल्या गालजीबाग नदीकाठालगतच्या घरांना धोका संभवतो.

वस्तुत: या किनाऱ्यावर पर्यटन व्यवसायाला बंदी असताना अनधिकृतरित्या गालजीबाग नदी किनाऱ्यावर पर्यटन व्यवसाय सुरू आहे. यापूर्वी गालजीबाग नदीने प्रवाह बदलून किनारा फोडला होता. पैंगीण जैवविविधता समितीने ही बाब वेळोवेळी संबंधितांच्या नजरेस आणून दिली होती, असे जैवविविधता समितीचे अध्यक्ष सुभाष महाले यांनी सांगितले.